Steikt eggjabrauð með rjómaosti, bláberjum, sírópi og ristuðum möndluflögum

Leyfið mér að kynna hin fullkomna sunnudagsmorgunmat! Þessa uppskrift rakst ég á í útlensku óléttublaði. Er með nokkur blöð í láni en einhvern veginn hef ég bara rétt nennt að glugga í þau, eitthvað annað en á fyrstu meðgöngu þegar maður bókstaflega drakk í sig allan fróðleik sem maður komst yfir. En já, rakst á þessa girnilegu uppskrift og var ekki róleg fyrir en búið var að prófa þetta. Þetta er auðvitað alveg dísætt en engu að síður yndislegt á fallegum sunnudagsmorgni. (Ath.þessi færsla er gömul, þessi uppskrift birtist fyrir rúmu 1 1/2 ári á Miðjunni)

Steikt eggjabrauð með rjómaosti, bláberjum, sírópi og ristuðum möndluflögum

• 1 lítill bláberjabakki (held að hann sé 100g)
• Hreinn rjómaostur
• 2 egg
• 2 eggjahvítur
• 2 msk hunang
• 4 sneiðar heilhveitibrauð
• 30 g smjör, helst ósaltað í grænu pökkunum
  
• Hlynssíróp
• 2 msk möndluflögur

Pískið saman egg, eggjahvítur, mjólk og hunang. Hitið smjörið á pönnu, við notuðum grillpönnu. Dýfið brauði í blöndu og steikið þangað til að þetta fær á sig lit. Á sama tíma, ristið möndluflögur þangað til að þær taka á sig smá lit. Smyrjið svo 2 brauðsneiðar ríkulega með smurostinum, látið fullt af bláberjum á milli og smellið saman. Skerið í tvennt, hellið svo sírópi yfir og stráið að lokum möndluflögum yfir. Lokið augunum og njótið þess að bíta í, og njótið þess að vera til!

Og þá er komin föstudagur aftur. Eins og ég get andvarpað mikið á
sunnudagskvöldum yfir því að helgin sé strax búin þá finnst mér vikan sem
betur fer fljót að líða. Ég hafði planað flókna matargerð í kvöld fyrir
bóndann en hef nú ákveðið að einfalda þetta aðeins og ætla að gera
Ravíolí með salvíu og furuhnetu smjöri. Einfalt en virkar alltaf. Gef upp
uppskriftina fljótlega. Í staðinn læt ég fylgja uppskrift af eftirrétt, ef
uppskrift má kalla því þetta er svo einfalt.

Grandmarinerís og hindberjasorbet

Því miður var þetta ekkert mælt í einingum en maður bara smakkar sig
áfram. Hér er það hráefni sem ég notaði:

• 1 l Bónusvanilluís
• Ca. 2dl trönuber
• 1-2 dl Grand Mariner
• Slatti af frosnum hindberjum
• Appelsínusafi
• Agavesíróp
• Blæjuber til skreytingar

Skellið bónusísnum, líkjörnum og trönuberjum í matvinnsluvel og hrærið
smá, skellið svo aftur í ísboxið og gott ef þetta fær að vera í frystinum í
alla vega klukkutíma áður en þetta er borið fram.

Blandið saman fullt af hindberjum, appelsínudjús og smá agavesírópi (getið
líka notað smá hunang/flórsykur) í matvinnsluvél/blandara. Hrærið, smakkið
og ef þetta smakkast vel þá skellið í form. Ég vil td. hafa þetta frekar
súrt. Ég gerði þetta daginn fyrir matarboð.

Mótið kúlur og skreytið með blæjuberi - Einfalt en gott - Góða helgi!

Mangó- og skyr eftirréttur

MM, mangó, súkkulaði, skyr ofl....

Ferskjusalat er ágætis forréttur

Hér er ein uppskrift sem ég klippti út úr blaði fyrir nokkrum árum. Skyr er gott og mjög skemmtilegt að gefa útlenskum vinum í eftirrétt. Kajsa, vinkona mín frá Vesterås í Svíþjóð og fyrrum bekkjarfélagi var hér í stuttri heimsókn og þá var þessi réttur hressandi á eftir ferskjusalati og chili/brokkólí pasta (læt það inn seinna)

Mangó- og skyr eftirréttur (f.6)

• 1 l hrært skyr
• Rifinn börkur af einni sítrónu
• 1 dl flórsykur
• 2 mangó
• 2 msk hrásykur
• 1 dl saxaðir pistasíu kjarnar
• 2 msk maldar kaffibaunir
• 1 dl fínsaxað dökkt súkkulaði
• 1/2 msk steyttir kardimommukjarnar

Gera:
Blandið sítrónuberkinum, flórsykri saman við skyrið. Afhýðið og skerið mangóið í teninga og blandið út í(fínt að geyma smá til skreytingar) Blandið kardimommu,kaffibaunum, hrásykri,hnetum og súkkulaði saman og skiptið svo í sexhluta, stráið í botninn á dessertskálunum, skyrblönduna ofan á og stráið líka ofan á. Svo er auðvitað hægt að láta þetta á fallegt fat, skyrblönduna fyrst og strá síðan hinu yfir og skreyta með smá mangó..

Oft þarf ekki mikið til að gleðja

Hélt brunch fyrir nokkrar vinkonur um daginn. Hafði verið að vinna á úrslitum Músiktilrauna kvöldið áður og því tekið meðvitaða ákvörðun um að halda myndarskapnum í lágmarki og hafa þægindin í hámarki. Þ.e. keypti bara það sem þurfti (stelpur, bíð næst upp á eggjahræru, pönnukökur og annað góðgæti) Og hjúkk, því ég var orðin frekar slöpp þegar stelpurnar komu og gjörsamlega raddlaus svo ég sat bara við endann og þagði að mestu (gott að aðrir fái loks að komast að, haha) Alla vega, að brunchinum loknum lá leiðin í afmæli hjá afa Eldars, honum Gísla. Hafði ætlað að kaupa eitthvað handa honum á leiðinni en tímaskortur gerði að ég ákvað bara að setja saman 2 muffins í sellófan með 2 litlum páskaeggjum og svo límdi ég eitt af uppáhalds lögum Sögu, Fann ég á fjalli, framan á en hún hafði verið að syngja þetta heima hjá langömmu og -afa um daginn og ömmu Guðný fannst það svo fallegt. Þetta hitti alveg í mark, sjálfri þykir mér svo gaman að svona gjöfum og maður þarf að muna að það er hugurinn sem skiptir máli.

Sumarlegt spaghetti og rosalegur eftirréttur

Hér kemur fyrsta uppskriftin í langan tíma. Við fengum góða gesti í heimsókn í íbúðina góðu sem við fengum lánaða í Gautaborg, þau Eyrúnu og Collin en við kynntumst þeim þegar við bjuggum hérna, Eyrún er íslensk eins og nafnið gefur til kynna en hefur búið í Gautborg meira eða minna alla sína ævi og Collin skoskur og flottur tónlistarmaður, hefur ma.spilað á Airwaves. Mun einnig gefa upp geggjaðan og einfaldan eftirrétt sem Eyrún kom með.

Það var 30.5 stiga hiti á föstudaginn þannig að ég gat ekki hugsað mér að fara út í flókna matargerð og þessi uppskrift varð fyrir valinu, var í einhverju blaði sem ég var að lesa á ströndinni:) Og trúið mér, grænbaunapestóið er hryllilega gott þótt nafnið kannski blekki. Grænar baunir eru líka voða hollar.

Sumarghetti með balsamic tómötum og grænbaunapesto.
Fyrir 2

• ca. 250 g spaghetti eða annað pasta
• 1/2 rauðlaukur
• 1 hvítlauksrif
• 1/2 dl ólífuolía
• 1 askja kirsuberjatómatar
• 1 dl balsamicedik
• salt og pipar
• 1/2 krukka fersk basilika

• Baunapestó:
• 2 dl frosnar grænar baunir
• 1 dl heslihnetur eða hýðislausar möndlur
• 1/2 dl olífuolía
• 1 lítið hvítlaukrif
• 2-3 msk sítrónusafi
• salt og pipar

Gera:
Pestó: ég lét baunirnar í skál og hellti svo yfir heitu vatni sem ég hellti aftur af eftir smá stund til að láta þær þiðna en ég skal viðurkenna að ég lenti í smá vandræðum að mixa þær þar sem ég notaði staf en maður átti helst að láta þetta í matreiðsluvel. Bætið út í öllu öðru og mixið vel en samt gott að mauka þetta ekki alveg.

Saxið rauðlaukinn smátt og steikið í olíunni á pönnu, kremjið hvítlaukinn yfir og bætið svo út í tómötunum í hálfum bitum eða í fjórum helmingum ef þeir eru stórir. Steikið í smá stund og hellið svo balsamic edikinu yfir.

Látið renna vel af pastanu, setjið aftur í pottinn og hellið yfir smá ólífuolíu og látið á lokið í smástund. Deilið svo pastanu á diskana, stráið yfir saxaðri basiliku, hellið yfir smá tómatajukki og síðan klípu af pestóinu. Verði ykkur að góðu!

Eyrúnar yummie

• Ferskur Ananas
• Hindber
• Hvítt súkkulaði
• Vanilluís

Gera: Skerið niður ananas í bita, blandið saman við hindberin í eldföstu móti, myljið hvíta súkkulaðið yfir og látið inn í heitan ofn í smá stund eða þannig að súkkulaðið bráðni, berið fram með ís!! 'Uff
Svo er auðvitað hægt að nota aðra ávexti og jafnvel dökk súkkulaði

Hafragúdís

Ég fékk uppskriftina af Havre godies/ hafrasælgæti (hafragúdís) í Ica búðinni sem var hliðina á þar sem við bjuggum í Majorna í Gautó. Þetta hef ég gert ótal oft, stundum með smá breytingum ef ég á ekki allt í þetta og þetta er rosalega gott. Er alltaf á leiðinni að prófa að gera þetta á hollari hátt, td sleppa sykri og smjöri eða eitthvað svoleiðis..læt vita þegar það hefur verið gert en þangað til...

Þetta er mjög sniðugt sem tækifærisgjöf og ömmum og öfum finnst gaman að fá svona, þau eiga jú allt svo smart að gefa svona og kannski gott kaffi með, namm!

Hafragúdís

• 2 dl haframjöl
• 1/2 sesamfræ
• 100 gr smjör
• 1/2 dl sykur
• 1/2 dl síróp
• 2 msk kakó
• 1 dl cashew hnetur, muldar
• 2 msk kókos (má sleppa)

Gera:
Ristið haframjölið svo það gyllist, takið svo af pönnu. Ristið sesamfræin svo þau taki á sig smá lit, en passið ykkur, því þau brenna hratt. Bætið út í smjöri og þegar það er bráðið, bætið þá sykri, sírópi, kakói og á endanum hnetum.
Takið blönduna af plötunni og bætið út í haframjölinu. Látið svo alla blönduna í form, þrýstið henni niður,stráið kókosmjöli yfir allt eða að hluta til , leyfið henni að standa í ca. 5-10 mín. og skellið svo inni í kæliskáp.

Ég vil hafa þetta fremur þétt og hart en sumir vilja hafa þetta meira laust í sér. Skerið svo í bita. Ég hef líka skorið þetta í lengjur og á ýmsan hátt.