Matur er manns gaman...

Innbakaður grænmetishleifur með púrtvínssósu

2012-01-26T15:55:00.000-08:00

Fann loks fína mynd af innbakaða hleifnum góða sem ég geri yfirleitt á Gamlárskvöld og um páska. Geri hleifinn líka stundum fyrir góða gesti, kannski dálítið til að sýna fram á að það er líka hægt að gera sparílegan mat með klassísku meðlæti eins og fólk td. fær sér með læri, hrygg og svo um jól. Hef prófað hnetusósu og sveppasósu með en þessi sósa er líka skemmtileg viðbót. Hvernig væri að prófa svona "steik" um helgina.

Innbakaður grænmetishleifur með púrtvínssósu

450gr kjúklingabaunir (ca 2 dósir, án vökvans)
1 tsk þurrger
150 gr saxaðir valhnetukjarnar
150 gr brauðrasp (ég nota bara úr pakka)
1 laukur, smátt skorinn
100 gr sveppir
50 gr gular baunir
2 - 3 msk púrtvín eða sherrí (ég nota púrt)
2 msk grænmetissoð (ég hef reyndar notað um 4msk, annars svo þurrt)
1 msk ferskur koríander
salt og pipar
225 smjördeig, í Nóatúni/Hagkaup hef ég fengið það í heilu lagi
1 egg
2 msk mjólk

Sósa

2 msk matarolía, td. rapsolía
1 púrra, þunnt sneidd
8 msk púrt (má nota sherri)
3 dl grænmetissoð

Blandið saman í matvinnsluvél, baunum, geri, valhnetum og brauðraspi, í 30-60 sek. Brúnið lauk og sveppi á stórri pönnu eða í potti, í 3-4 mín. Bætið út í baunablöndunni á pönnuna og svo einnig maís og hvítlauk. Bætið út í víni, soði og kóríander, blandið öllu saman. Takið af hellu og látið kólna. Breiðið út smjördeigið, myndið hleif úr blöndunni og þjappið henni vel saman, leggið hana inni í smjördegið og lokið undir, bleytið gjarnan þar sem þið lokið smjördeginu. Stingið göt í deigið. Blandið eggi og mjólk, penslið hleifinn og skellið inn í 200 gráðu heitan ofn og bakið í um 30-40 mín eða þar til deigið hefur tekið á sig fallegan lit. Til að gera sósuna, hitið olíuna í potti, brúnið púrru í um 5 mín. Bætið í víni g soði, fáið upp suðu og látið svo "simmer"(hvað er orðið) í 5 mínútur.
Berið fram með dásamlegu meðlæti og njótið!

Polenta á fennikubeði.

2012-01-22T06:55:00.000-08:00

Polenta er ósjaldan á mínum borðum. Ég átti fenniku (fennel) í ískápnum en fyrir jól steikti ég fenniku í smjöri, sírópi, salti og pipar og hafði ofan á beðinu grillaðan halloumi og fannst mér það smakkast vel saman. Í þetta skiptið átti ég ekki ostinn góða og ákvað því að útbúa polentu "medalíur". Eins eru rauðrófur mikið notaðar á heimilinu og tilvalið að rífa niður ferska rófu með. Þetta var sem aðalréttur hjá okkur en uppskriftin ætti að duga sem forréttur fyrir 4 en þá mætti kannski bæta annari rauðrófu við en ég notaði reyndar litla. Gerði þetta síðustu helgi og vona að ég muni þetta rétt

Polenta á fennikubeði

7 dl vatn
2 dl polentugrjón
1 grænmetisteningur
1-2 dl rifinn ostur, má sleppa
1 dl paramesan, helst ekki sleppa
Rifinn börkur af hálfri sítrónu
2 fennikur
Síróp
1 rauðrófa
1 fersk fíkja, má sleppa
Smjör til steikingar
Balsamikedik
Salt og pipar

Setjið vatn og tening í pott, fáið upp suðu, takið pottinn aðeins af hellunni og hellið polentu út í og hrærið hratt með písk, passa að ekki myndist kögglar, látið aftur á helluna sem ætti að vera á miðlungshita og hrærið endalaust, það skvettist stundum upp úr pottinum svo ég tek pottinn oft aðeins af og læt á. Þegar þetta er orðið að mjúkri hræru, skellið þá ostinum út í og hrærið niður. Látið svo hræruna í olíusmurt form, ég notaði form sem er ca. 20cm x 15 en getið líka notað bökuform og bara að reyna að hafa þykktina ca. 1 1/2 - 2 cm. Látið formið inn í ískáp.

Skerið af efri og neðri hluta fennikunnar, stundum þarf að henda ysta lagi,skerið í strimla, skolið og þurrkið. Steikið í smjöri, þegar þetta verður pínu glært, skellið þá 1-2 msk af sírópi, getið notað agave en ég notað hlynssíróp (maple). Ég saltaði og pipraði aðeins.

Afhýðið rauðrófuna, ekki vitlaust að nota lítinn plastpoka eða eitthvað til að halda við svo rauði liturinn festist ekki á fingrunum. Notið rifjárn og rífið, helst ekki of fínt. Geymið í skál og mig minnir að ég hafi skvett smá sítrónu yfir.

Takið polentu út úr ískáp. Ég á svona "sívalinga" sem ég keypti í Kokku sem ég nota stundum við matargerð. Notaði þann minni sem er ca. eins og bolli að þvermáli. Notaði eins og form og skar út nokkar "medalíur". Held að það sé alveg hægt að nota bolla til að skera út en annars bara skera í ferninga, ekkert verra. Steikti svo litlu polentubitana upp úr lítilli olíu. Lét sívalinginn á diskana og lét steiktu fennikuna ofan í, svona til að það myndi mynda hringlaga beð (alveg hægt að gera bara fríhendis og gera með höndum). Lét svo polentubita ofan á beðin, lét svo sívaling aftur ofan á polentu, fenniku ofan í og svo aftur polentubita yfir. Látið 1-2 tsk af balsamic yfir rauðrófuna og hrærið í. Ég lét svo sívalinginn við hliðina á "turninum" og hellti rauðrófunni ofan í. Átti ferska fíkju og lét þannig bát efst. Drukkum spánskt rauðvín með og allir mjög sáttir eða já, við bæði, hjónin.

Möndlu- og chili spaghettí

2012-01-15T13:29:00.000-08:00

Eins og ég hef nefnt í eldri færslu, þá eru mánudagar oftast pastadagar og þriðjudagar súpudagar á heimilinu. Ég er frekar heilalaus eftir vinnu þá daga og þá gott að vera búin að þrengja valið aðeins. Ég gef sjaldan upp fyrir hversu marga uppskriftirnar eru en ætla að reyna að hafa það í huga. Oftast er ég þó að elda fyrir okkar þriggja manna fjölskyldu og þá með það í huga að maður geti fengið sér ábót, enda er það alveg nauðsynlegt fyrir matargat eins og mig.

Möndlu- og chili spaghettí varð niðurstaðan einn mánudag í janúar og verður gert aftur. Ég elska chili og ég elska möndlur svo það kom ekki á óvart. Heimasætan er aftur á móti á tómatsósu tímabilinu og vonandi eldist það bara af henni. Ég nota Sambal Olek , chilimauk sem ég kaupi venjulega í asísku búðinni við Hlemm og nota í súpur og ýmislegt annað. En það má alveg nota ferskan chili, kannski hálfan til heilan um leið og hvítlaukurinn er steiktur. Held að þetta hafi verið nokkurn veginn svona. Ath. Þetta er gömul færsla frá mér af Miðjunni. Heimasætan er ennþá á tómatsósutímabilinu og við hefur bæst brosmoli sem deilir hennar dálæti.

Möndlu- og chili spaghettí

Ca. 300 gr spaghetti (ég notaði heilhveiti)

3-4 tómatar

1 hvítlauksrif

1 1/2 msk ólífuolía

2 dl fersk basilika (ca. 2-3 tsk þurrkuð giska ég á?)

1/2 til heil tsk sambal olek (smakkið ykkur áfram)

1/2 tsk salt

1 dl möndlur (ég notaði flögur)

Sjóðið pastað samkvæmt leiðbeiningum. Hitið olíu og steikið tómatana og hvítlaukinn, leyfið aðeins að malla þangað til vökvinn byrjar að aukast frá tómötunum, bætið þá sambal olek út í og rífið basilikuna útí(geymið smá til „skreytingar), saltið, hrærið í og lækkið hitann. Á sama tíma, ristið möndlur á pönnu þangað til að þær taka smá lit á sig. Hellið af pastanu, látið standa í 1 mín. Hellið ólífuolíu yfir spaghettíð og hrærið lauslega í gegnum. Setjið á diska, látið tómatchiliblöndu með möndlunum yfir og að lokum stráið smá ferskri basiliku yfir ef notuð. Maðurinn minn notaði paramesan yfir en ég vildi sleppa því í þetta skiptið. Ég mæli jafnvel með að gera tvöfalda uppskrift af gumsinu því það er svo gott en ég nenni ekki að breyta uppskriftinni.

Steikt eggjabrauð með rjómaosti, bláberjum, sírópi og ristuðum möndluflögum

2012-01-14T06:33:00.000-08:00

Leyfið mér að kynna hin fullkomna sunnudagsmorgunmat! Þessa uppskrift rakst ég á í útlensku óléttublaði. Er með nokkur blöð í láni en einhvern veginn hef ég bara rétt nennt að glugga í þau, eitthvað annað en á fyrstu meðgöngu þegar maður bókstaflega drakk í sig allan fróðleik sem maður komst yfir. En já, rakst á þessa girnilegu uppskrift og var ekki róleg fyrir en búið var að prófa þetta. Þetta er auðvitað alveg dísætt en engu að síður yndislegt á fallegum sunnudagsmorgni. (Ath.þessi færsla er gömul, þessi uppskrift birtist fyrir rúmu 1 1/2 ári á Miðjunni)

Steikt eggjabrauð með rjómaosti, bláberjum, sírópi og ristuðum möndluflögum

1 lítill bláberjabakki (held að hann sé 100g)
Hreinn rjómaostur
2 egg
2 eggjahvítur
2 msk hunang
4 sneiðar heilhveitibrauð
30 g smjör, helst ósaltað í grænu pökkunum
Hlynssíróp
2 msk möndluflögur

Pískið saman egg, eggjahvítur, mjólk og hunang. Hitið smjörið á pönnu, við notuðum grillpönnu. Dýfið brauði í blöndu og steikið þangað til að þetta fær á sig lit. Á sama tíma, ristið möndluflögur þangað til að þær taka á sig smá lit. Smyrjið svo 2 brauðsneiðar ríkulega með smurostinum, látið fullt af bláberjum á milli og smellið saman. Skerið í tvennt, hellið svo sírópi yfir og stráið að lokum möndluflögum yfir. Lokið augunum og njótið þess að bíta í, og njótið þess að vera til!

Yndislegt lasagne

2012-01-14T03:44:00.000-08:00

Það verður að viðurkennast að þessi húsmóðir hefur verið lítið skapandi í eldhúsinu undanfarið. Kannski er það lítið að fara að breytast en hver veit. Til að koma mér í gang þá ætla ég að byrja á því að birta nokkrar uppskritir sem ég gaf upp á Miðjunni sálugu sem ég sakna. Ætla mér að elda eitthvað nýtt og gott í kvöld enda laugardagskvöld, ekkert á dagskrá, bara að njóta sín og vera til og þá er gaman að elda mat.

Þessa uppskrift fann ég einhvern tíma á netinu og þetta er besta lasagne sem ég hef búið til og gott að búa til tvöfalda uppskrift og frysta. Einföld uppskrift er reyndar ágætlega stór en hver vill ekki taka með sér afganga í vinnuna? Þetta tekur smá tíma í fyrsta skipti en alveg þess virði!

Yndislegt lasagne

Rauð sósa:

* 2-3 gulir laukar

* 3-4 gulrætur

* 2-3 hvítlauksrif

* 2 dl rauðar linsur

* 2-3 dl vatn

* 2 dósir hakkaðir tómatar

* 5-6 msk tómat pure

* 1 grænmetistengingur

* Ólífuolía

* Salt, svartur pipar, sykur, basilika, oregano,paprikuduft, chilli,cayenne pipar

Laukurinn skorinn smátt. Gulrætur rifnar gróft. Hvítlaukurinn pressaður og látið þetta þrennt mýkjast í olíunni á pönnu. Linsunum bætt við ásamt vatni, tening, tómötunum og tómatpure.

Hvít sósa:

* 300-400 g kotasæla

* 3 dl rifinn ostur (geyma hluta til að láta ofan á)

* 200 g frosið spínat

* Salt, hvítur pipar, múskat (alveg hægt að nota svartan pipar)

Spínat látið þiðna(hef hellt sjóðandi vatni yfir/hitað í örbylgju) og kreista svo vatnið vel af (ég nota kartöflupressu). Öllu blandað vel saman og kryddað.

Lasagne plötum er raðað á botninn í eldfast form. Því næst er sett rauð sósa, plötur, hvít sósa og plötur. Þetta er endurtekið þar til formið er fullt. Endað er á plötum, ofan á þær er stráð rifnum osti og að lokum er 1-2 dl af mjólk hellt yfir allt saman. Bakað í ofni, 200° í ca.40 mínútur.

Kartöfluklattar

2011-07-11T17:38:00.000-07:00

Og þá kom ný færsla.
Sumarfríið byrjað, maður er aðeins farin að slaka á og þá kemur andinn yfir mann. Er búin að vera elda aðeins oftar núna upp á síðkastið og það er yndisleg tilfinning. Og eftir smá hvatningu ákvað ég að skella inn einni uppskrift eða svo. Fór í Ikea í dag, ekki farið síðan fyrir jól held ég bara. Sögu finnst svo gaman að fara þangað svo úr varð smá ferð. Enduðum í "matvöruversluninni" þar sem ég fæ alltaf smá Sverige nostalgíu.

Keypti rösti eða kartöfluklatta, 8 stk. í frystinum á fínu verði. Fínt og fljótlegt í kvöldmat og hægt að leika sér með þetta, bæði sem aðalrétt eða forrétt, svo er bara að láta ímyndunaraflið. Í Svíþjóð fær fólk sér oft sultu með þessu. Vil taka það fram að þetta er nú varla uppskrift, svo einfalt er þetta en ofurgott engu síður. Þetta varð útkoman hjá mér.

Ég steikti klattana í mjög lítilli ólífuolíu og lét svo rifinn ost ofan á þegar klattarnir voru næstum tilbúnir og leyfði þeim að vera áfram á pönnunni þangað til að osturinn bráðnaði. Lét svo spínat á þá alla áður en annað var látið ofan á.

Klatti með rauðrófurjóma
1 lítil rauðrófa, rifin
hálf dós sýrður rjómi
1 tsk dijon

Klatti með rifnum gulrótum,
nýrnabaunum, fetaosti, sítrónuskvetta, salt og pipar.

Klatti með tómötum,
litlum súrum gúrkum, salti og pipar.
Hér hefði ég viljað hafa mozzarella ost,ólífur eða rauðlauk en átti ekki til. Var að fatta að ég átti camembert í ískápnum, það hefði verið hressandi. Next time baby.

Og svo varð maður auðvitað að fá smá eftirrétt, ekki beint uppskrift en þetta var bara svo fallegt og sumarlegt svo ég varð að taka mynd. Lífræn grísk jógúrt, crunchy musli og plómur. Kannski gott að láta smá agave útí fyrir þá sem þykir jógúrtin of súr. Og fínt að fá sér bara lítinn skammt. Þótt ég hefði svo sem alveg viljað meira.

Er komin með nýja bloggslóð

2010-01-22T10:30:00.000-08:00

Hæ hó,
er nú farin að blogga um mat á Miðjan.is eða nákvæmlega hér.
Þakka öllum þeim sem nennt hafa að skoða þetta blogg sem ég byrjaði á þegar ég var í
fæðingarorlofi fyrir 3 árum. Hver veit nema að ég verði aðeins duglegari nú þegar bloggið
er á svona skemmtilegum lífstílsvef sem fjölmargir lesa!

Hafið það gott,
Eva

Indverskur gulróta og rauðrófuréttur

2009-10-27T15:23:00.000-07:00

Hafði með heimabúna raita, pitubrauð sem ég læt inn í ofn með smá olíu og kúmenfræum, spínat, hrísgrjón og svo picklesið góða..

Þeir sem þekkja mig vita að ég elska rauðrófur. Langaði í eitthvað með indversku ívafi, þá helst til að geta borðað með "pataks lime pickles" sem ég hafði keypt, ég er eiginlega sjúk í það og mæli með að eiga eina krukku af svona í ískápnum. Ég ákvað að skrifa niður það sem ég setti út í pottinn og sé ekki eftir því, þetta var mjög vel heppnaður réttur þó ég segi sjálf frá og húsbóndinn kvartaði ekki. Ekki láta það stoppa ykkur ef þið eigið ekki sinnepsfræin. En þau eru hressandi í flestan indverskan mat og því gott að eiga í skápnum. Sé að einhverjir eru að lesa þessar uppskriftir. Ef eitthvað er óljóst, þá bara að spyrja. Veit að ég er ekkert mjög nákvæm og ég td. er yfirleitt ekkert að segja hvernig á að skera laukinn, í nákvæmlega hversu margar mínútur sumt að vera osfrv. En endilega spyrja/senda in comment ef eitthvað er óljóst, þykir vænt um það.

Indverskur gulróta- og rauðrófuréttur

1 laukur
2 hvítlauksrif
3 gulrætur
2 rauðrófur
2 dl rauðar linsur
2 dl heitt vatn plús 1/2 grænmetisteningur
1 kókósmjólk
1/4 chayenne pipar
1/2 sinnepsfræ (mustardseeds)
1 tsk cumin
1 tsk turmeric
1/2 tsk engifer
Salt og pipar

Gera
Steikið lauk og hvítlauk í 2-3 mínútur, bætið svo út í linsum, gulrótum og rauðrófum, steikið í 1-2 mínútur, stráið þá öllu kryddum yfir og hrærið í. Hellið soðinu yfir og fáið upp suðu. Bætið þá kókósmjólk útí. Örlítið salt og pipar. Látið í malla í ca. hálftíma (úbs, gleymdi að skrifa það hjá mér en minnir að það sé 30-45mín)

Pasta með sikileysku/n-afrísku ívafi

2009-10-19T13:51:00.000-07:00

Mánudagar eru pastadagar á þessu heimili. Ég átti brokkólí sem þurfti að nota en langaði ekki í "rauða" pastasósu (tómataeitthvað) og ekki mjólk/ost/rjómakennda sósu. Fann skemmtilega en öðruvísi uppskrift á netinu sem var með brokkólí. Í henni áttu að vera heimagerðar semólínu makkarónur sem ég skipti út fyrir heilhveiti penne, í staðinn fyrir ansjósur notaði ég capers og í stað saffrans notaði ég smá turmeric. Með öllum hinum hráefnunum varð þetta hin fínasti pastaréttur .

Pasta með sikileysku/N-afrísku ívafi

Ca 200 g heilhveitipasta penne
Miðlungs brokkóli
1 gulur laukur
2-3 tsk capers
2 msk rúsínur
2 msk furuhnetur
1/2 tsk turmeric
1 1/2 msk tómatpurre
Olía, salt og pipar
paramesanostur

Gera: Sjóðið pastað samkvæmt leiðbeiningum, munið að salta vel, finnst það mikilvægt þegar heilhveiti eða speltpasta er notað því það er sætara á bragðið. Skerið laukinn frekar smátt og steikið í ólífuolíu. Þegar laukurinn byrjar að taka á sig lit, bætið þá capers yfir og steikið aðeins lengur. Á meðan ég steikti laukinn sauð ég vatn í hraðsuðuketlinum sem ég hellti svo yfir brokkólíið og leyfði því aðeins að standa en ég vill hafa það brakandi. Látið tómatpurre yfir laukinn og capers, hrærið og hellið svo brokkólívatninu, um 3 dl, yfir. Fáið upp suðu og látið malla í smá stund, látið svo turmeric, furuhnetur og rúsínur útí og hrærið og að síðustu, saltið, piprið og látið brokkólí og sigtað pastað útí. Leyfið að standa á litlum hita í 10 mínútur. Berið fram og stráið rifnum paramesan yfir.

Mangó- og skyr eftirréttur

2009-09-13T05:08:00.000-07:00

MM, mangó, súkkulaði, skyr ofl....

Ferskjusalat er ágætis forréttur

Hey, hver saknar ekki skyr auglýsingana þar sem útlendingar eru að leita af skyri (djók)
Hér er ein uppskrift sem ég klippti út úr blaði fyrir nokkrum árum. Skyr er gott og mjög skemmtilegt að gefa útlenskum vinum í eftirrétt. Kajsa, vinkona mín frá Vesterås í Svíþjóð og fyrrum bekkjarfélagi var hér í stuttri heimsókn og þá var þessi réttur hressandi á eftir ferskjusalati og chili/brokkólí pasta (læt það inn seinna)

Mangó- og skyr eftirréttur (f.6)

1 l hrært skyr
Rifinn börkur af einni sítrónu
1 dl flórsykur
2 mangó
2 msk hrásykur
1 dl saxaðir pistasíu kjarnar
2 msk maldar kaffibaunir
1 dl fínsaxað dökkt súkkulaði
1/2 msk steyttir kardimommukjarnar

Gera:
Blandið sítrónuberkinum, flórsykri saman við skyrið. Afhýðið og skerið mangóið í teninga og blandið út í(fínt að geyma smá til skreytingar) Blandið kardimommu,kaffibaunum, hrásykri,hnetum og súkkulaði saman og skiptið svo í sexhluta, stráið í botninn á dessertskálunum, skyrblönduna ofan á og stráið líka ofan á. Svo er auðvitað hægt að láta þetta á fallegt fat, skyrblönduna fyrst og strá síðan hinu yfir og skreyta með smá mangó..

Bulgur með blauðlauk og trönuberjum

2009-09-09T04:44:00.000-07:00

Hér er einn, einfaldur og góður bulgur réttur. Trönuberin koma "skemmtilega" inn. Þau eru dálítið dýr en ég sá þau á snakkstandi í 10-11 þar sem þau kostuðu undir 300 kr og það er ágætisverð. Svo má alveg nota 1 dl, ég notaði eitthvað minna af því restina notaði ég í eitthvað annað. Svo má örugglega prófa rúsínur. Ég nota ekki oft smjör en í þessum rétti fannst mér smjörið ómissandi, púrra og smjör gefa svo gott bragð saman en það má líka alveg nota olíu..bar þetta fram með ruccola salati og brauði.
Bulgur með blaðlauk og trönuberjum ( f.6)

4 msk smjör
5 dl niðurskorinn blaðlaukur(púrra)
12 dl grænmetissoð ( 2ten)
7 dl búlgur
1 Gul paprika
2 dl trönuber ( þurrkuð)
2 dl möndluflögur, ristaðar (má sleppa)

Svo mætti vel bæta við kjúklingabaunum, þær myndu passa vel með og gera réttinn drýgri og einnig eru þær auðugar af sinki, fólasíni og próteini sem er ekki verra ef maður vill auka næringargildið.

Gera:
Steikið blaðlaukinn í smjöri eða þangað til hann er orðinn vel mjúkur. Hellið þá soðinu yfir og látið suðu koma upp. Hellið þá bulgunum út í og hrærið, sjóða í ca. 5mín. Bætið trönuberjum og paprikubitum útí og takið af hellunni, látið lokið á og látið standa í ca. 10-15mín. Hrærið í með gaffli, til að skilja grjónin að. Saltið og piprið. Stráið svo möndluflögunum yfir.

Rauðlauks-og fetaferningar og Satay núðlur

2009-08-30T03:22:00.000-07:00

Fyrst var grislingunum gefið að borða svo þeir fullorðnu gætu borðað næstum ótruflaðir inni í stofu. Laufey alltaf jafn fyndin

Fengum okkar kæru vini, Bjarka, Laufey og Hrafnkel Núma í mat. Sá síðasnefndi og heimasætan Saga eru miklir mátar og missa sig alveg þegar þau hittast. Bjó til tvo fremur fljótlega rétti sem er nauðsynlegt á föstudögum þegar allir eru pínu þreyttir eftir vinnu og leikskóla. Báðar uppskriftir eru studdar við uppskriftir úr bók sem Barclay vinur minn gaf mér og heitir 101 Veggie dishes..

Rauðlauks- og fetaferningar

1 smjördeigsrúlla (eða plötur í rauðu pökkkunum)
1 stór rauðlaukur
2 msk púðursykur
2 msk balsamic edik
1 lítil krukka svartar ólífur, skornar í helminga
Handfylli af basiliku, rifin

Gera: Látið smjördeigið þiðna. Stillið ofnin á 180 gráður. Stráið smá hveiti yfir og rúllið það út og látið á bökunarplötu, með bökunarpappír. Skerið laukinn niður í ræmur, steikið hann á pönnu, ég notaði ólífuolíu en hefði jafnvel notað smjör ef ég hefði átt það. Stráið smá salti yfir og steikið í ca. 5 mínútur. Hellið þá púðursykri yfir, hrærið og hellið svo balsamic edikinu yfir, leyfið þessu að malla í ca. 5 mín í viðbót eða þangað til þetta er svona pínu eins og síróp. Takið af pönnunni og leyfið að kólna aðeins. Stráið jafnt ólífunum yfir smjördeigið og svo fetaostinum, dreifið svo yfir laukblöndunni. Bakið í ofninum í ca. 15-20 mínútur eða þangað til deigið hefur lyft sér og tekið lit. Takið út og skerið í ferninga, stráið svo basilikunni yfir. Over & out

Satay núðlur

1 pakki eggjanúðlur
4 msk hnetusmjör
4 msk sweet chili sósa
1 dl kókosmjólk
1 dl grænmetissoð (ég notaði hálfan tening í sjóðandi vatn)
3 msk soya sósa
2 msk sesamolía
3 msk rifin engiferrót
1 lítið brokkólíhöfuð
1 rauð paprika
1 pakki grænar baunir( man ekki hvað þær heita, langar og hálfmánalaga)
1 dós babymaís, skorin á lengdina ( ég notaði reyndar ekki alla dósina á endanum)
3 hvítlauksrif, fínskorinn
lúkufylli af basilikunni (líka í forréttinum, gaman að skipta út kóríander og spara spara)
smá salt

Gera: Blandið saman hnetusmjöri, chillisósu, kókosmjólk, soði og soya, hrærið saman þangað til þannig að allt blandist saman. Hellið sjóðandi vatni yfir núðlurnar og látið nuðlurnar losna í sundur, hellið svo vatninu af. . Hitið sesamolíuna á wokpönnu eða annarri pönnu. Snöggsteikið brokkólí, papriku, maís og engiferið. Bætið svo grænu baununum og hvítlauk út í. Steikið í ca. 2 mínútur, hellið þá sósunni yfir og látið suðu koma upp. Blandið núðlum útí. Stráið basilikunni yfir og berið fram. Fínt að bera fram chilimauk/krydd/sweetchili fyrir þá sem vilja meira spicy. Einnig smart að leggja lime sneið á hvern disk fyrir þá sem vilja smá sítrus bragð.

Marókkó linsusúpa

2009-08-29T06:17:00.000-07:00

Kannski ekki besta myndin, gleymdi að taka hana heima en tók þessa með gemsanum daginn eftir í vinnunni

Eftir allar sumarbústaðaferðir, grillmat og ferð til útlanda í sumar þá getur maður ekki beðið eftir að komast aftur í hversdagsleikann (minnið mig á þetta í næstu viku). Ég ætla að reyna að hafa smá reglu á matnum í vetur svo mánudagar eru td. spaghettí/pasta dagar því maður er svo þreyttur og latur þá. Þriðjudagar eru súpudagar, miðvikudagar eru snarldagar en þá fer ég í blak, fimmtudagur grænmetis/baunaréttur dagar og föstudagar pizza/tortillu/pítu/grænmetishamborgara dagar. Hinu held ég opnu. Síðastliðinn þriðjudag langaði mig svo í linsusúpu en með einhverju twist. Ákvað að nota krydd eins og garam masala og kardemommur. Kardemommur hafa ríkjandi og skemmtilegt bragð og nota ég "heilar" kardemommur sem ég mel í morteli og nota fræin sem eru innan í því þá nær maður hámarksbragði en það er hægt að kaupa þetta malað, sjá hjá bökunarvörum. K er einnig notað í arabískt kaffi og gefur því sérkenni,þið sem hafið verið í Palestínu eða mið-austurlöndum þekkið þetta vel.

Marókkó linsusúpa

2 laukar
2 hvítlauksrif
2 tsk rifið engifer
12 dl heitt vatn + 2 teningar
1-2 dl rauðar linsur
1 dós svartar baunir (það má alveg nota aðrar baunir en þessar pössuðu rosalega vel)
1 dós hakkaðir tómatar
gulrætur í teningum
sellrí bitar
1 1/2 tsk garam masala
1/2 - 1 tsk cayenne pipar
1 tsk cumin
ólífuolía
salt og pipar

Gera: Steikið lauk, hvítlauk og engifer í ólífuolíunni í ca. 5 mínútur. Bætið út í linsum, gulrótum og sellerí, steikja í 1 mínútu í viðbót, hellið svo kryddunum yfir (ekki salti og pipar samt) hrærið í og hellið svo tómötum yfir og soði. Látið suðuna koma upp í nokkrar mínútur og látið svo malla alla vega í klukkustund. Hellið svo hluta/helming af súpunni í ílát og mixið með sprota eða í matvinnsluvel, hellið aftur út í. Bætið svörtu baununum útí ca. 15 mínútum áður en hún er borin fram. Það sem er mjög mikilvægt við þessa súpu er að hún verður að fá að malla lengi svo brögðin fái að njóta sín og ekki var hún verri daginn eftir í vinnunni, mmm.

Sætkartöflu- og aspas hreiður

2009-08-29T01:09:00.000-07:00

Fengum góðan vin okkar, Aðalstein Rúnar í mat. Þennan forrétt bjó ég til í snatri og bara bullaði eitthvað. Útkoman var bara nokkuð góð. Og ekki verra að sötra mojito með. Þar sem ég hef verið vægast sagt löt, sjá færslu fyrir neðan, þá man ég svona nokkurn veginn hvað ég gerði.
Sætkartöflu- og aspas hreiður

Filodeig (fæst í betri stórmörkuðum)
Sæt kartafla
Ferskur aspas
Sítrónusafi
Smjör
Timjan
Salt og pipar

Skerið sætu kartöfluna í teninga og látið út í sjóðandi saltað vatn svo hún mýkist aðeins en ekki of mikið. Það sem margir ekki vita er að sæt kartafla er í raun úr rófuætt og þess vegna þarf hún mun minni suðutíma en td. venjulega kartafla. Látið aspasinn í sjóðandi vatn í ca. 3-5 mín. Þerrið kartöflur og aspas. Ég hafði aldrei unnið með filodeig, það er þynnra en smjördeig og þarf mjög stuttan tíma í ofni. Ég skar og reif það í ferninga sem ég svo lét ofan í muffinsstálform, það er að segja, bjó til sex hreiður og skellti því svo inn í ofn. Á meðan lét ég smá smjör á heita pönnu, skellti kartöflum og aspas á í stutta stund, kryddaði með salti, pipar, timjan og smá sítrónusafa. Mér fannst timjan gera mikið fyrir bragðið. Það stóð svo til að láta þetta ofan í "hreiðrin" og aftur inn í ofn en þau voru orðin dökk og stökk svo ég lét fyllingu í hvert hreiður og bar strax fram á beði spínatblaða. Úr varð hin fínasti forréttur.

Hitt og þetta

2009-08-28T02:11:00.000-07:00

Undanfarna mánuði hef ég tekið myndir af mat sem ég hef eldað en aldrei drifið lengra enn það, þe. að skrifa uppskriftina, láta myndirnar inn í tölvuna osfrv. Og svo auðvitað gleymi ég bara hvað ég setti í þegar ég hef verið að "bulla" eitthvað yfir pottunum. Langar samt að henda inn nokkrum myndum en sleppi mörgum, bara langar að deila þessum myndum sem tengjast góðum minningum.

Elísabet Narda ásam foreldrum kom í mat og kom heldur betur færandi hendi, gaf Sögu hjólið sitt og hjálm, svo góð við yngri vinkonu sínaÉg eldaði einn Dahl rétt og indverskan rauðrófurétt en man ekkert hvað var í þessu annarsPablo virtist sátturEldur var einnig mættur ásamt Myrru móður sinni, hann og Elísabet Narda að gæða sér á blönduðum melónukúlum. Sagan var farin í háttinn

Sætu Santos hjónin

Var í London í júní, borðaði geðveikan mexíkanskan mat á stað í Covent Garden að mig minnir, namm

Fór á námskeið í Guimares, Portúgal í júní, þar sem gjörsamlega var dekrað við grænmetisæturnarFrá Portúgal, mmm

Einhverjir afgangar úr ískápnum, var svo ofsagott og litríkt, sýnist þetta vera hirsi/quinoa, gulrætur, harricot baunir (á alltaf til frosnar) vínber, tómatar, sítrónusafi, salt, feta on the side..

Engiferyndi

2009-05-04T15:41:00.000-07:00

Átti kóríander og engifer og langaði að nota það. Átti engar núðlur, langaði í eitthvað létt og mjög fljótlegt. Þetta varð útkoman og ég held að ég sé ekki að gleyma neinu, hafði svo sem ekki ætlað þetta síðunni en fannst þetta bara svo gott og ekki verra að 5 mín tók að gera þetta. Það er nauðsynlegt að eiga strengjabaunir eða hvað þær nú heita í frystinum, ég nota þær endalaust.

Engiferyndi

Sorry, hér verða engin hlutföll uppgefin, bara man þau ekki en maður fær alla vega hugmynd um hvernig maður gerir þennan ofureinfalda og létta rétt.
Skellti sesamlíuolíu á pönnuna, svo lauknum og á eftir því hvítlauknum, lét malla í smá stund. Skellti svo frosnu baununum út í og reif svo engiferið yfir, lét malla stutta stund í viðbót áður en ég bætti við kjúklingabaununum og lét malla örlítið lengur. Stráði kóríander yfir og kreisti svo yfir smá lime. Það er svo auðvitað tilvalið að hafa þetta með núðlum eða grjónum með en ég vildi þetta svona létt þetta skiptið.

Oft þarf ekki mikið til að gleðja

2009-04-19T14:10:00.000-07:00

Hélt brunch fyrir nokkrar vinkonur um daginn. Hafði verið að vinna á úrslitum Músiktilrauna kvöldið áður og því tekið meðvitaða ákvörðun um að halda myndarskapnum í lágmarki og hafa þægindin í hámarki. Þ.e. keypti bara það sem þurfti (stelpur, bíð næst upp á eggjahræru, pönnukökur og annað góðgæti) Og hjúkk, því ég var orðin frekar slöpp þegar stelpurnar komu og gjörsamlega raddlaus svo ég sat bara við endann og þagði að mestu (gott að aðrir fái loks að komast að, haha) Alla vega, að brunchinum loknum lá leiðin í afmæli hjá afa Eldars, honum Gísla. Hafði ætlað að kaupa eitthvað handa honum á leiðinni en tímaskortur gerði að ég ákvað bara að setja saman 2 muffins í sellófan með 2 litlum páskaeggjum og svo límdi ég eitt af uppáhalds lögum Sögu, Fann ég á fjalli, framan á en hún hafði verið að syngja þetta heima hjá langömmu og -afa um daginn og ömmu Guðný fannst það svo fallegt. Þetta hitti alveg í mark, sjálfri þykir mér svo gaman að svona gjöfum og maður þarf að muna að það er hugurinn sem skiptir máli.

Spínat- og skyr tortillur á tómatbeði

2009-04-15T15:27:00.000-07:00

Hrefna mágkona mín passar stundum Sögu fyrir okkur. Þá reynir maður nú helst að gefa henni gott í gogginn svo að hún vilji koma sem oftast. Ekki nóg með að þessi uppskrift sé ljúfeng, þá er hún bara nokkuð holl. Mig minnti að ég væri þegar búin að gefa hana upp, geri þetta reglulega, en eftir að hafa rennt í gegnum þær uppskriftir sem komnar eru, þá sé ég að ég minnist á hana í október 2007 að ég hafi eldað þetta handa Karlottu systir og mág minn þegar þau pössuðu einmitt. Um leið og ég renndi yfir þá tók ég eftir hversu fáa eftirrétti ég hef gefið upp, en þeir hafa og eru alltaf mín veika hlið. Segjum það áskorun héðan í frá!

"Pössunartortillur" með spínati og skyri á tómatbeði

1 rauðlaukur, skorin
1-2 hvítlauksrif, kraminn
500 g ferskt spínat, 250 g frosið.
150 g. hreint skyr
100 g rjómaostur
1/2-1 tsk múskat
1/2 - 1 dós nýrnabaunir
1 dós niðursoðnir tómatar
4 msk sýrður rjómi (má sleppa)
4 tsk paramesan ostur
salt og pipar
6-8 heilhveititortilllur eða bara venjulegar

Steikið lauka í olíu í 2-3 mín á háum hita, lækkið svo hitann, sér í lagi ef notað er fryst spínat, hrærið og snúið því við þangað til það er farið að losna í sundur, það gæti þurft að hella auka vökva í burtu, ef ferskt er notað þá bara steikja þangað til að það hefur mýkst og minnkað. Bætið svo út í baunum, skyri og rjómaosti, kryddið með salti, pipar og múskati.

Smyrjið eldfast mót með ólífuolíu, hellið tómötunum útí, saltið, piprið og notið jafnvel chayenne pipar eða chili pipar. Skiptið fyllingunni á pönnukökurnar, rúllið upp og látið "sárið" snúa niður. Bakið í ca. 15 mín á 200∘

Takið út og skellið smá sýrðum rjóma og paramesan á hverja tortillu. Ég bar þetta svo fram með brúnum grjónum og góðu salati.

Ítölsk páskabaka

2009-04-12T13:13:00.000-07:00

Jæja, enn og aftur komnir páskar. Ég held voða mikið upp á páskana. Birtan er yfirleitt svo falleg á þessum tíma, týpískt gluggaveður má segja. Hef átt afmæli stundum á páskadag, m.a. á tvítugsafmælinu sem er mér eftirminnilegt. Ákváðum loks að láta verða af því að fara á hina frábæru hátíð, Aldrei fór ég suður. Ætluðum öll fjölskyldan að fara. För var frestað á skírdag þegar Saga var veik. Og enn var hún veik á föstudeginum svo við hjónin flugum vestur og hún í góðum höndum tengdó. Í stuttu máli, urðum líka fárveik og ég sá lítið meira en hótelherbergið og við snerum tilbaka daginn eftir. Hér kemur uppskrift af páskaböku frá Piedmont héraði á N-Ítalíu. Gerði þessa á skírdag og telst því til páskamats. Þetta tekur smá tíma en höfum við tíma til að horfa á sjónvarp eða hanga í tölvunni, þá höfum við nú örugglega smá tíma í matseld um páskana. (Talað beint frá sjónvarps- og tölvuglápandi frúnni)

Ítölsk Páskabaka

85 g klettasalat
1 laukur, saxaður
2 hvítlauksrif, söxuð
200 g arborio risotto grjón
7 dl grænmetissoð
1 1/4 dl hvítvín (má sleppa)
50 g rifinn paramesan
120 g frosnar grænar baunir
2 tómatar, skornir í teninga
4 egg, vispuð
3 msk marjoram, saxað
55 g brauðrasp

Hitið ca. 2 msk af ólífuolíu á pönnu og léttsteikið laukinn og hvítlaukinn í 4-5mín. Skellið grjónunum útí, leyfið grjónunum að verða "gegnsæ" og byrjið þá að hella yfir vökvanum, koll af kolli og leyfið vökvanum að gufa upp áður en meiru er hellt yfir, muna að hræra vel. Látið svo vínið yfir þegar á líður (ef vín er ekki notað þá nota bara aðeins meira soð)

Þegar risottoið virðist tilbúið, þá bæta út í osti, baunum, klettasalati, tómötum, eggjum og 2 msk af marjoram. Saltið og piprið vel og hrærið öllu vel saman.

Látið í djúpt kökuform sem búið er að smyrja með smjöri og þjappið blöndunni í formið. Stráið brauðraspinu og 1 msk af marjoram yfir.

Bakið í 180 C í 30-40 mín eða þangað til raspið verður gullið. Berið fram með góðu salati.

Tælensk linsu- og kartöflusúpa

2008-11-21T02:03:00.000-08:00

Ég hef gert það einstaka sinnum að elda hérna í Hinu Húsinu handa mannskapnum og auðvitað með hjálp samstarfsmanna. Búlgarska linsusúpan kom td. sterk inn. Þessi súpa er svo einföld og góð en svo er líka bara svo huggulegt að borða öll saman svona í skammdeginu þar sem við erum ekki með mötuneyti. Ég gerði sem sagt áttfalda uppskrift þarna um daginn en hér er einföld. Mæli þó með að maður geri tvö- eða -þrefaldi, svo frystið þið þetta bara. Það er líka hægt að bæta grjónum út í afganginn og láta inn í tortillu.

Tælensk linsu- og kartöflusúpa

1/2 laukur
1 hvítlauksrif
1 tsk red currypaste (gott frá thai-choice, gott að eiga í ískápnum)
1 tsk rifið engifer
2 dl rauðar linsur
6dl vatn
1 grænmetisteningur
ca. 1 1/2 dl kókosmjólk
2 tómatar
1 meðalst.kartafla
1 lime
1 rautt chili
salt
kóríander
Gott að bæta út í 2 limeblöðum eða sítrónugras ef maður á til

Gera:
Hellið olíu í pott, setjið út í lauk, hvítlauk og chili, steikið í ca. 2 mín. Bætið svo linsum,kartöflum og tómötum út í og steikið í 1-2 min. í viðbót, hellið þá yfir soðinu (vatnið og teningurinn) Fáið upp suðu, og látið svo sjóða í nokkrar mínutur og lækkið svo aðeins undir og látið malla. Rífið smátt börkinn af lime út í og notið svo líka safann úr því, ca. 1-2msk. Látið kókosmjólkina og engifer út. Látið ca. lúkufylli af kóríander út í. Saltið aðeins. Malla aðeins. Bera svo fram með kórander ofan á. Einnig er gott að rista möndluflögur, og dreifa yfir. Verði ykkur að góðu!

Huggulegt matarboð

2008-11-20T14:22:00.000-08:00

Sósan er eiginlega enn fallegri í "alvöru", meira bleik

Þarna sitjum við, ég hálfskrítin á svip og kannski ekki besta myndin en fær að fylgja með:)

Fennikan góða, þetta er í raun mjög einfaldur og góður forréttur

Jæja, þá er komið að því, Rauðrófu pasta rétturinn góði! Fengum Helgu Kristínu, Alla og Hrefnu mágkonu í heimsókn. Fengum reyndar aukaheimsókn en það er önnur saga. Það er ekkert leyndarmál að ég elska rauðrófur svo hér kemur ein góð uppskrift, tekin úr bók sem heitir "Grænmetisréttir af gnægtarborði jarðar", bók sem einhver góður gaf mér fyrir löööngu síðan, örugglega 15 árum síðan og hún var alltaf ofan í einhverjum kassa, beið örugglega eftir að ég gerðist grænmetisæta. Eldar fór í fyrra í Kolaportið þar sem bókin var á söluborðinu. Ég gluggaði í hana og bjargaði henni frá sölu, enda "gnægtir" af góðum uppskriftum! Í henni fann ég líka fínan forrétt þar sem aðalhráefnið er fennika, á myndinni lítur hann reyndar pínu út eins og hálf akurhæna eða eitthvað en látið ekki myndina blekkja. Voila!

Rauðrófupasta
handa 4

225 g soðnar rauðrófur
2 hvítlauksrif
1 msk sítrónusafi
3 dl rjómi
1 tsk balsamedik
1 tsk dijon sinnep
sjávarsalt og nýmalaður svartur pipar
400 g pasta (ég notaði tagliatelle)
1 msk ólífuolía

Gera: Setjið rauðrófurnar, hvítlaukinn, sítrónusafann og helminginn af rjómanum í matvinnsluvél eða blandara og gerið úr því jafnt mauk. Setjið blönduna í meðalststóran pott, hellið afganginum af rjómanum ´út í og hitið við lágan hita. Látið þetta hitna vel í um 8-10 mínútur en ekki sjóða. Bætið við balsamediki, sinnepi, salti og mikið af pipar. Hrærið vel og hafið lágan hita. Sjóðið pastað. Látið renna af pastanu í sigti, látið aftur í pottinn, hellið yfir olíunni og hrærið. Deilið pastanu á diska og svo sósu yfir, ekki verra að strá ferskri kryddjurt yfir. Yummie (þá má jafnvel láta aðeins meira dijon ef maður er sjúkur í dijon eins og ég)
p.s. svona á "krepputímum" þá er ég að spá í að prófa rauðrófur í krukku, ath bara að þær eru bæði súraðar og sætar svo kannski þarf að breyta eitthvað hlutföllum á öðru. Einnig nota ég yfirleitt matreiðslurjóma í stað venjulegs

Bökuð fennika

900 g fennikuhnýði (keypti í Hagkaup, ekki eins dýrt og ég hélt en þetta var fyrir "kreppu"
50 g smjör
1/2 tsk múskat
salt og nýmalaður svartur pipar
50 g nýrifinn paramesan ostur

Hitið ofninn í 200, Hreinsið fennikuna, fleygið öllum sködduðum blöðum, skerið fíngerðu blöðin af (líta pínu út eins og dill). Skerið "hnýðin" þversum eða í tvennt og sjóðið í léttsöltuðu vatni þar til þau eru mjúk, í ca. 10-15 mín. Látið renna vel af þeim. Smyrjið grunnt ofnfast fat. Setjið fennikuna í fatið og stráið á hana múskati, salti og pipar. Setjið afganginn af smjörinu ofan á í. í klípum o gstráið paramesan ostinum efst. Bakið í miðjum ofni þar til rétturinn er orðinn gullbrúnn, í um 10 mínútur. Setjið fíngerðu fennikublöðin yfir og berið fram

Hirsi tacos

2008-10-27T08:37:00.000-07:00

Jæja, spurning um að vera með nýja uppskrift á 3 mánaða fresti. Ég er með nokkrar í biðstöðu og nú ætla ég að vera aðeins duglegri því mér finnst þetta svo skemmtilegt, ja að laga mat en löt að blogga. Ekki er verra að flestar uppskriftana á blogginu eru ódýrar eða í ódýrari kantinum og það er algjör goðsögn að það sé endilega dýrt að vera grænmetisæta.

Var víst löngu búin að lofa að láta þessa inn því hún bara klikkar ekki, holl og alls ekki dýr(er í bókinni Vego sem var fyrsta grænmetisuppskriftabók okkar Eldars). Hirsi er járn- og steinefnaríkt og grænu linsurnar eru einnig mjög járnríkar (gott fyrir grænmetisætur og konur á blæðingum)

Eins og ég hef oft sagt áður þá látið ekki innihaldslistann hræða ykkur því þegar þið hafið gert þennan rétt einu sinni, þá verður ekki aftur snúið og þá getur maður líka leikið sér aðeins með hann.

Hirsi tacos

2dl soðið hirsi (ég giska á að það sé 1 og 1/2 dl ósoðið)
2dl soðnar grænar linsur ( sama hér myndi ég giska)
4dl vatn
2 dl nýrnabaunir ( skellið bara öllu útí ef þið notið úr dós svo engu sé hent)
1 rauð paprika
grænar baunir
1 gulur laukur
2-3 hvítlauksrif
1 gulrót
1 tómatur
1 dós hakkaðir tómatar
olía
salt og pipar
tacoskeljar
Avacado (ég bý til guacamole, má sleppa)
rifinn ostur
1stk chili (ef Saga er ekki með, annars kryddar maður bara sjálfur eftirá)

Gera:
Sjóðið hirsi og linsur í vatninu, hakkið smátt lauk, hvítlauk, gulrót og papriku, léttsteikið í olíu. Bætið svo út í hirsiblöndunni og nýrnabaunum og hellið svo hökkuðu tómötunum útí og blandið öllu saman. Leyfið þessu að malla í ca. 10 mínútur. Hitið tacoskeljarnar í ofni. Bætið svo út í grænu baununum og kryddið með salti og pipar og berið fram í skeljunum ásamt avacado eða guacomole, og rifnum osti.

Ég tek svo yfirleitt allt fram sem til er: feferoni (þetta græna á myndunum, fæst í ýmsum betri búðum), fetaost, jalapenos, grænar ólfur, salat og bara allt sem manni dettur í hug

Maður getur að sjálfsögðu notað annars konar grjón/korn, rauðar linsur, maísbaunir í stað grænna bauna, annað grænmeti, frosið grænmeti og mjúkar tortillur. Nú eða borða þetta bara sem pottrétt.

Sumarlegt spaghetti og rosalegur eftirréttur

2008-07-28T00:41:00.000-07:00

Hér kemur fyrsta uppskriftin í langan tíma. Við fengum góða gesti í heimsókn í íbúðina góðu sem við fengum lánaða í Gautaborg, þau Eyrúnu og Collin en við kynntumst þeim þegar við bjuggum hérna, Eyrún er íslensk eins og nafnið gefur til kynna en hefur búið í Gautborg meira eða minna alla sína ævi og Collin skoskur og flottur tónlistarmaður, hefur ma.spilað á Airwaves. Mun einnig gefa upp geggjaðan og einfaldan eftirrétt sem Eyrún kom með.

Það var 30.5 stiga hiti á föstudaginn þannig að ég gat ekki hugsað mér að fara út í flókna matargerð og þessi uppskrift varð fyrir valinu, var í einhverju blaði sem ég var að lesa á ströndinni:) Og trúið mér, grænbaunapestóið er hryllilega gott þótt nafnið kannski blekki. Grænar baunir eru líka voða hollar.

Sumarghetti með balsamic tómötum og grænbaunapesto.
Fyrir 2

ca. 250 g spaghetti eða annað pasta
1/2 rauðlaukur
1 hvítlauksrif
1/2 dl ólífuolía
1 askja kirsuberjatómatar
1 dl balsamicedik
salt og pipar
1/2 krukka fersk basilika

Baunapestó:
2 dl frosnar grænar baunir
1 dl heslihnetur eða hýðislausar möndlur
1/2 dl olífuolía
1 lítið hvítlaukrif
2-3 msk sítrónusafi
salt og pipar

Gera:
Pestó: ég lét baunirnar í skál og hellti svo yfir heitu vatni sem ég hellti aftur af eftir smá stund til að láta þær þiðna en ég skal viðurkenna að ég lenti í smá vandræðum að mixa þær þar sem ég notaði staf en maður átti helst að láta þetta í matreiðsluvel. Bætið út í öllu öðru og mixið vel en samt gott að mauka þetta ekki alveg.

Saxið rauðlaukinn smátt og steikið í olíunni á pönnu, kremjið hvítlaukinn yfir og bætið svo út í tómötunum í hálfum bitum eða í fjórum helmingum ef þeir eru stórir. Steikið í smá stund og hellið svo balsamic edikinu yfir.

Látið renna vel af pastanu, setjið aftur í pottinn og hellið yfir smá ólífuolíu og látið á lokið í smástund. Deilið svo pastanu á diskana, stráið yfir saxaðri basiliku, hellið yfir smá tómatajukki og síðan klípu af pestóinu. Verði ykkur að góðu!

Eyrúnar yummie

Ferskur Ananas
Hindber
Hvítt súkkulaði
Vanilluís

Gera: Skerið niður ananas í bita, blandið saman við hindberin í eldföstu móti, myljið hvíta súkkulaðið yfir og látið inn í heitan ofn í smá stund eða þannig að súkkulaðið bráðni, berið fram með ís!! 'Uff
Svo er auðvitað hægt að nota aðra ávexti og jafnvel dökk súkkulaði

Halló halló

2008-07-23T02:57:00.000-07:00

Ákvað að prófa að skrifa eitthvað, mundi passwordið til að komast inn og allt. Ég held að ég hafi farið í blogg diet, bæði þá að skrifa blogg og lesa önnur blogg. Ég hef þó ekki hætt að elda og hætti því nú varla úr þessu....

Við fjölskyldan erum í sumarfríi, það byrjaði frekar brösulega og og það er ástæða fyrir því að framan á mörgum "kvennablöðum", alla vega hér úti (erum í Gautaborg) eru greinar með tiltlum á borð við þessa; Hið fullkomna sumarfrí, hvað er það"?, "Afhverju er ég ekki glöð í sumarfríinu"? Osfrv. Það er ótrúlegt hvað það getur tekið langan tíma að "trappa sig niður" og ég var td. alveg ómöguleg fyrstu dagana þannig séð, langaði að gera allt og ekkert á sama tíma, og allt á að vera svo fullkomið, ja ég er alla vega svona og það er eins og ég læri ekki af reynslunni. Kannski þarf ég bara að sættast við að svona er Eva en stefna á að verða alltaf aðeins betri með hverju ári og sumarfríi.

En já, við flugum til Köben og heimsóttum Önnu Lindu og áttum yndislega daga með henni, fórum í dýragarðinn, það var sól og djass hátíð, yndislegt. (ég er ekki dýramanneskja eða dýragarðsmanneskja en það er eitthvað sem gerist þegar maður er í för með barninu sínu) Bláberjapönnukökur í morgunmat, gott rauðvín, góðar samræður, æðislegt!

Fórum svo til Hrefnu mágkonu minnar í Árósum, sem var að klára MA ritgerðina sína og bara orðin sálfræðingur, erum svo stolt af henni. Áttum frábæra daga og mikil huggulegheit, elduðum fullt af góðum mat og Saga og Hrefna, frænkurnar fínu gátu kynnst svolítið betur og það er augljóst að Saga er mjög hrifin af henni.

Erum nú komin til Gautaborgar, á fornar slóðir menntaáranna, erum í yndislegri íbúð á góðum stað sem vinkona mín á en hún ætlar einmitt að vera í okkar íbúð heima. Við höfum það ótrúlega gott, Saga rosa sátt og talandi um það, ætla út í góða veðrið með henni.....ciao

p.s. stefnan er sett á að bæta inn einni uppskrift eða svo í vikunni.

Klettasalatssúpa

2008-02-07T10:14:00.000-08:00

Ég, Myrra og Helga ákváðum að hittast eitt kalt föstudagskvöldið og mig langaði að gera góða súpu án þess að þurfa að kaupa mikið inn (það er átak hérna að nota það sem til er) Þessi súpa frá Sollu(Grænn Kostur ) varð fyrir valinu og vá hvað hún er góð, og einföld. Borðuðum frábært muslibrauð með sem tengdamamma hafði bakað og gefið mér. Ég mæli með þessari, hún er æði! Ath. Ég gerði tvöfalda en einföld ætti að duga sem forréttur. Og eitt enn, Eldari finnst frekar erfitt að fara ekki alveg eftir uppskrift og það á örugglega um fleiri. Þess vegna skrifa ég oft aðra möguleika eða hvað er ekki nauðsynlegt svo maður veigri sér ekki við að gera sumar uppskriftir þótt ekki allt sé til í þær.

Klettasalatssúpa

1 stk laukur
smá ólífuolía
1 1/2 dl mysa (þarna notaði ég hvítvín)
1/2 lítri vatn
1-2stk grænmetisten.
1 dl kókosmjólk
100g klettasalat
smá sjávarsalt
cayennepipar af hnífsoddi

Ofan á:

smá klettasalat
1/2 dl ristaðar kókosflögur (má sleppa )
2-3 stk vorlaukar (má sleppa)

Gera:
Saxið laukinn smátt, hitið olíu í potti og mýkið laukinn í um 10 mín. Bætið mysu, vatni, grænmetiskrafti og kókosmjólk útí, látið malla í 10 mín. Setjið í blandara/notið töfrasprota ásamt klettasalatinu og bagðið síðan með salti og pipar. Mýkið vorlauk á pönnu í 2-3 mín, Þurristð kókosflögurnar á pönnu þar til gylltar. Stráið þeim svo yfir súpuna ásam vorlauk og smá klettasalati. Voila!

Rauðrófuklattar með kóríander rjóma

2008-02-07T06:32:00.000-08:00

Jamm, ný uppskrift, enda tími til kominn. Og gleðilegt ár og allt það. Andleysið hefur verið í meiralagi og hreinlega engir aukakraftar í matreiðslu og bloggskrif. Janúar var pínu þungur svona fyrir sálartetrið en finn að maður er allur að koma til með hækkandi sól. Byrjaði í nýju starfi í byrjun janúar, kynningarfulltrúi að gera ýmislegt í Hinu Húsinu og ég kann bara mjög vel við mig. Það var smá breyting að byrja í fullu starfi eftir að hafa verið í verkefnavinnu og ráðið sér og sínum tíma sjálf.
Finnst pínu erfitt að venjast því að sækja ekki Sögu mína þar sem ég er að vinna til kl. 17 og stundum lengur, en þetta er allt að koma og vá hvað helgarnar verða heilagar, maður kann svo sannarlega að meta þær. Fórum í helgarferð til London, litla fjölskyldan, mamma mín, Freyja og Gauti. Það var mjög fínt og sól alla dagana spillti ekki fyrir.

Héldum smá matarboð í janúar, gerði þessa klatta í forrétt í fyrsta skipti og ekki það síðasta. Mjög auðvelt! Mæli með að nota plasthanska, nota þá yfirleitt þegar ég nota rauðrófur því þær lita svo mikið. (það er örugglega hægt líka að nota gulrætur í stað rauðrófa) Í aðalrétt buðum við upp á hina góðu Kasjúw paellu, uppskriftin hérna.

Rauðrófuklattar með kóríander rjóma

1 stór rauðrófa, ca 75gr
2 kartöflur
1/2 gulur laukur
1 egg
1 krm salt
Olía til steikingar

Kóríanderrjómi

1 dós sýrður rjómi
3-6 msk hakkaður kóríander
smá salt

Gott að gera blanda þessu saman og leyfa að standa í kæli í smá tíma. Endilega bragðbætið með smá hvítlauk eða piparrót

Gera: Flysjið rauðrófur og kartöflur og takið utan af lauk, rífið gróft í skál. Bætið út í eggi og salti, fletjið út í 4-6 klatta, kreistið úr sem mestan vökva ef hann hefur myndast, skellið á pönnu og steikið á meðalhita í ca. 3 mín. hvora hlið. Berið gjarnan fram á salatbeði (spínat, ruccola) og skellið slettu af kóríanderrjóma ofan á.

Leyfi myndum af tilraunasushigerð að fljóta með, ég get reynt að setja inn uppskrift ef einhver hefur áhuga? Er engin sérfræðingur í þessu.

Gleðilega hátíð og allt það

2007-12-27T07:15:00.000-08:00

Kæru vinir og vandamenn.

Vona að þið hafið átt ánægjuleg jól og að þið hafið getað slakað aðeins á.
Við höfum haft það mjög gott, mörg góð fjölskylduboð og smá afslöppun.
Það hefur nú verið frekar rólegt í eldhúsinu á þessum bæ, alltaf sömu réttirnir en vonandi verður þar breyting á nýju ári. Annars vil ég bara þakka fyrir mig og mína á árinu sem er að líða og hlakka til spennandi tíma á nýju ári. Má til með að láta fylgja með myndbút með Sögu minni en hún Helga Kristín gaf okkur þetta í aukajólapakka og erum við henni þakklát, alltaf gaman að rifja upp "gamlar" stundir með henni Sögu okkar. Þarna er hún í ungbarnasundi:)
Sjá: "Saga Sundgarpur"

Gleðilegt nýtt ár!!!!

Blaðlauks- og valhnetubaka

2007-12-10T10:23:00.000-08:00

Gerði þessa böku um daginn, finnst bökur svo góðar og alls ekki nógu dugleg við að búa til svoleiðis, ég held að það verði boðið upp á þessa í afmælinu hennar Sögu sem haldið verður uppá næstu helgi, magnað, dóttir mín er að verða eins árs, tíminn flýgur svo sannarlega!

Deig

150g heilhveiti
75 g smjör
1 tsk olía
1-2 msk kalt vatn

Fylling

200 g blaðlaukur
2 dl grænmetissoð (vatn+hálfur ten)
200 g kotasæla
3 egg
100 g rifinn ostur
3 egg
35 g saxaðir valhnetukjarnar
1/2 tsk paprika
1/2 tsk sellerisalt (eða bara venjulegt)
1/4 tsk hvítur pipar

Hnoðið allt deigið í matvinnsluvel og geymið í ísskáp á meðan fyllingin er útbúin.
Skerið blaðlaukinn í 2-3 mín í sjóðandi grænmetissoðinu, takið úr soðinu og látið drjúpa vel af.

Hrærið vel saman kotasælu, egg og rifinn ost. Blandið blaðlauknum og valhnetukjörnunum varlega út í . Kryddið með papriku, sellerísalti og pipar.

Smyrjið eldfast mót, fletjið út degið og klæðið formið að innan með því. Hellið fyllingunni yfir og bakið á 220 C í 30-50 mín.

Grænmetischili með couscous

2007-12-07T10:31:00.000-08:00

Þennan rétt byrjaði ég að gera fyrir löngu, mjög einfaldur en góður og kanelstöngin gerir punktinn yfir i-ið.

2 dósir niðursoðnir tómatar
1 rauðlaukur (stór) 2 chilipipar, ferskir, gjarnan bæði rauður og grænn)
4 sólþurrkaðir tómatar (má sleppa ef ekki til)
1 kanilstöng (má nota bara kanel)
3 paprikur (rauð,gul,græn)
1 dós niðursoðnar nýrnabaunir
1 msk rauðvínsedik (eða annað edik)
1 msk hrásykur (eða sykur eða ljós púðursykur)
1 tsk salt

Gera
Hellið tómötunum í pott, saxið rauðlaukinn, chilipiparinn og sólþurrkuðu tómatana ásamt kanilstöng og sjóðið í 10-15 mín. Skerið paprikurnar í strimla, látið malla í 10-15mín. Bætið útí ediki, sykri og salti. Matreiðið couscous/bulgur samkvæmt leiðb. á pakka. Þrýstið ofan í litla bolla og hvolfið á disk, látið chili í kring.

Rómó Frakklandsferð

2007-12-04T12:22:00.000-08:00

Ok, þetta er lengsta bloggfærsla í heimi og svo mætti halda að við vinnum fyrir franska hótelmálaráðið, ef það er til, haha...
Við fórum sem sagt til Frakklands í helgarferð, 16.-19.nóvember en 17. nóv áttum við 10 ára samveruafmæli.Var pínu kvíðin vegna Sögu sem var hjá ömmu og afa í Birkihvammi á meðan og var hér með að hætta alveg á brjósti. Fékk smá grátkast í flugvélinni og var dálítið aum fyrsta daginn en svo varð þetta allt í lagi. Og hún var glöð og góð allan tímann!
Þegar við vorum komin út þá vissum við ekki alveg hvernig við ættum að koma okkur til Lille, en þangað lá leiðin að sjá hljómsveitina Beirut. Viðmót fólksins á flugvellinum var alveg einstaklega gott og allir mjög hjálpsamir. Eftir vangaveltur út af samgönguverkfalli ákváðum við að leigja bíl. Hitastigið var um frostmark og sól á lofti, alveg fullkomið og fallegt. Komumst loks til Lille en við áttum frekar erfitt með að komast á hótelið sökum mikillar umferðar og einstefnugötur alls staðar. Hugsið ykkur svekkjandi, sáum hótelið hinum megin við lítið torg en 30 mínútum seinna komumst við sökum einstefna, en hei, komumst á endanum á hótelið. Þá var ca. 1 klst í tónleika og við alveg búin á því. Töluðum við móttökufólkið og komumst að því að tónleikarnir voru ekki í Lille heldur í Tourcoing, litlum bæ nálægt. Pínu stress en enduðum á að taka leigubíl og komumst á leiðarenda. Það var einhver Ástralskur trúbardor, búsettur í Lille, sem hitaði upp. Úff, hann var hræðilegur og þetta hefði aldrei gerst í henni Reykjavík. En á endanum byrjaði Beirut og vá, ég bara táraðist! Fannst svo óraunverulegt að ég væri stödd í einhverjum frönskum smábæ að bera eina af uppáhaldshljómsveitum mínum augum. Lentum svo í skemmtilegu eftirpartý með fólkinu sem vann á þessum tónleikastað.
Vorum gjörsamlega búin þegar við loks vöknuðum á laugardagsmorgun um kl. 11. Fengum okkur morgunmat, ég verslaði smá en hefði viljað meiri tíma, í götunni þar sem hótelið okkar var voru minnst 7 barnaverslanir. En engin tími þar sem við þurftum að ná að skila bílnum aftur á flugvöllinn. Náðum að skila bílnum en þó heldur seint.
Þá tók við frekar löng leigubílaferð frá flugvellinum á hótelið okkar, Hotel Lotti, sem er í fyrsta hverfi og við hliðina á Louvre safninu og við vorum komin þangað um kl. 18 á laugardeginum...og búðirnar að loka kl. 19.00. Vorum gjörsamlega búin en ég varð nú aðeins að komast í búðir þar sem allt var lokað á sunnudeginum og við heim á mánudeginum. Náði í H&M og keypti mér smá fínt en fann því miður baby GAP þegar þau voru búin að loka:(
En átti yndislegt kvöld með Eldari sem hafði fengið tips í lobbíinu og þau pantað borð fyrir okkur á frábærum stað sem hét Borlotti, voða flottur og frekar nálægt hótelinu en það var víst ómögulegt að fá leigubíl, enda laugardagskvöld. Og hann var alls ekki eins dýr og mætti ætla.
Fullkomið rómó kvöld og bara farið frekar snemma heim, um að gera að njóta þess að vera á hótelherbergi og geta sofið út.
Byrjuðum sunnudaginn á frábærum brunch á stað sem heitir Nomad. Enduðum svo reyndar á að borða þarna um kvöldið, mælum alveg með þessum stað. Við ákváðum að þetta væri bara svona chill ferð og lítill túrismi. Fengum okkur góða og fallega gönguferð að Eiffelturninum. Löbbuðum meðfram Signu, sáum fallega ljósmyndasýningu, fórum á kaffihús til að hlýja okkur og drekka smá rauðvín en það var hryllilega kallt þennan dag. Náðum loks á topp turnsins en ég get svarið það, í biðröðinni þá voru börn sem ég er viss um að voru að gráta sökum kulda, þetta var rosalegt og þá sérstaklega efst í turninum. En til að klára mjög langa sögu, komumst heim á mánudeginum, það var yndislegt að ná í hana Sögu okkar sem fagnaði mikið og þetta var yndisleg ferð og ég mjög þakklát Birk13 fyrir hjálpina!

Matarboð á Skúló

2007-11-22T15:41:00.001-08:00

Haldið var á dögunum matarboð á Skúló, flestir að vinna hjá hr. Örlygi eða tengt því, reyndar vantaði sjálfan Mr. Red eða senior Destino, Þorstein og var hans sárt saknað og annað boð í uppsiglingu þegar hann er á landinu!
Boðið var upp á innbakaðann kjúklingabaunahleif (synd að ég tók engar nærmyndir, verð að segja að sá sem var gerður núna var fallegri og betri en þeir sem ég hef gert áður, maður aðlagar víst að sér réttina), boðið var upp á púrtvínssósu og hnetusósu með, Sara sæta kom með sætar kartöflur/gulrætur gums, Dill og Mill komu með geggjað salat, svo voru auðvitað strengjabaunir, ferskur aspar og annað gómsætt með. Við vorum öll svo södd og litla eldhúsið í rúúuust svo ég komst aldrei í að gera eftirréttinn, það verður bara næst:) Svo verð ég að fara að standa mig í uppskriftunum og segi næst smá frá Frakklandsferðinni.

Matarboð í Mosó

2007-11-21T04:31:00.000-08:00

Þetta myndarlega útskorna grasker tók á móti okkurSaga er mjög hrifin af litla frænda, honum Eldari HrafniÞað er nú kósý að hafa svona sætt kríli í fanginu

Saga var sífellt á ferðinni að kanna nýjar slóðir

Eldar og Eldar Hrafn, flottir frændur og nafnar

Yndislegur matur að vanda, 2 tegundir af bökum, þar af ein með sætum kartöflum sem var alveg geggjuð, namm

Hóffí með prinsinn sinn

Síðasta færsla var kannski ekki mjög jákvæð, hmm, skrifuð í einhverjum hita seint um kvöld. En vá, ferðin var æði og mun ég segja betur frá henni þegar Eldar er búin að hlaða myndum inn, einnig frá matarboðinu sem var haldið hérna um daginn, margir farnir að bíða eftir þeim myndum. Svo luma ég á einhverjum nýjum uppskriftum og þetta er bara allt að koma. En þangað til, þá ætla ég að deila með ykkur nokkrum myndum frá huggulegu matarboði hjá Kristínu og Hóffí, súpermömmum, fékk að stela nokkrum myndum frá þeim.

París, hér kem ég, andskotinn!

2007-11-13T15:54:00.000-08:00

http://www.myspace.com/beruit

"Búist við ringulreið í samgöngum í Frakklandi"
Ekki alveg fyrirsögnin sem ég vildi lesa á mbl.is, arg arg

Ok, við Eldar erum sem sagt á leiðinni til Parísar á föstudaginn, stefnan reyndar tekin á Lille á föstudeginum, ætluðum sem sagt að taka lest frá flugvellinum og þangað, til að sjá Beirut spila þar um kvöldið, búin að panta flott hótel þar og allan pakkan bara. Og núna verður sem sagt bara allt í lamasessi, æðislegt! Ekki!! Svo ósanngjarnt, við erum sko búin að vera í 10 ár saman og þetta er því svona rómó ferð en núna á allt bara að vera í einhverju fokki, gátu þeir ekki byrjað í verkfalli í næstu viku, nei.

Bara svona fyrir ykkur sem muna, þá fór ég í "pílagrímsferð" síðastliðinn mars, að sjá hljómsveitina Archade Fire í Köben, hvað gerðist,jú , þeir spiluðu kvöldið áður í stokkhólmi og svo varð söngvarinn veikur so no show...

Ég veit að bara það að hafa átt þessi 10 ár með Eldari ætti að nægja mér en þetta er bara dálítið svekkjandi, dálítið...góða nótt

Valhnetu- og ólífu pasta

2007-11-08T02:00:00.000-08:00

Bauð tengdó og Sunnu mágkonu í mat um daginn, langaði að gera einhvern nýjan pastarétt og fann þessa uppskrift í matarbibilínunni okkar, "1000 vegetarian recipes" sem er uppáhaldsbókin mín án efa, þar er hægt að finna hinar ótrúlegustu uppskriftir og fá góðar hugmyndir. Er einmitt núna að fletta í gegnum hana þar sem við erum með matarboð fyrir starfsfólk Mr.Destiny á morgun, hmm, hvað ætti maður að elda??

Valhnetu- og ólífu pasta

3 heilhveiti brauðsneiðar, skorpa tekin
300 ml mjólk (ég notaði fjörmjólk)
275 gr valhnetur
2 hvítlauksrif, kramin
115 g steinlausar svartar ólífur
55 gr rifinn paramesan ostur
8 msk ólífuolía
salt og pipar
1 dós sýrður rjómi (ég notaði 5%)
1-2 dl rjómi
3 msk söxuð steinselja

Látið brauðið í fat og hellið mjólkinni yfir þannig að það dragi hana í sig. Skellið valhnetunum í ofn í 5 mín.,200 gráður. Látið brauðið, hnetur,hvítlauk, olífur, paramesan og 6 msk af olíunni í matvinnsluvél og gerið að mauki. Bætið þá út í salti og pipar (það þarf mjög lítið ef ekkert salt) og hrærið svo að lokum rjómanum út í. Berið fram með með fettuccine eða tagliatelle, stráið yfir steinseljunni og kannski 1-2 ólífum, voila!

Graskerssúpa ofl

2007-10-25T15:25:00.000-07:00

Saga, steinhissa með sæta, litla graskerið

Súpan góða

Mæðgurnar á góðri stundu í eldhúsinu

Afi Einar, húsfreyjan og Saga sterka

Moi, Helga skvís og Laufey skvís, dálítið gular eitthvað

Gott rauðvín spillir svo sem ekki fyrir góðum indverskum mat

Og að síðustu, gullskór, alveg málið á þessu heimili

Keypti lítið grasker um daginn. Vissi ekki alveg hvað ég ætti að búa til en þetta varð útkoman, mér fannst þetta bara mjög gott, enda mikil súpukelling. Ég vil taka það fram að ég fer oftast eftir uppskriftum eða alla vega að hluta til. Þessi er að hluta til byggð á sænskri uppskrift sem ég fann á netinu og svo bara bull frá mér.

Leyfði nokkrum öðrum myndum að fljóta með, m.a. myndir frá matarboði síðustu helgi þar sem Helga, Laufey, Bjarki, Hrafnkell Númi ofl kíktu við, svaka huggó og góður indverskur matur en lélegar myndir og leti í gangi (ömmurnar hefðu ekki verið sáttar að sjá mann bera þetta svona fram (allt á síðustu stundu á skúló og ekki í fyrsta skipti)

Graskerssúpan

800gr Graskers"kjöt" (sætar kartöflur gætu alveg gengið)
1 laukur
2 hvítlauksrif
1 l grænmetissoð (vatn+2 teningar)
1 dl mjólk (ég hefði örugglega notað aðeins meiri mjólk í stað vatns en átti hana ekki)
Safi úr hálfu eða heilu lime (ég notaði hálft)
2-3 tsk sambal olek (chili krydd jukk sem ég kaupi í Nóatúni, örugglega hægt að nota ferskan eða þurrkaðan chili í staðinn.)
Salt og pipar af vild
Sýrður rjómi, ein sletta í hverja skál
Graskersfræ til að strá yfir(helst rista þau)
Ferskur kóríander

Mýkið lauk og hvítlauk í potti, skerið grasker í teninga og skellið útí. Steikið í smá stund og látið hellið svo soðinu yfir. Ef þið notið ferskan chili, látið hann þá útí áður en þið látið soðið yfir. Látið sjóða í ca. 10 mín. Bragðbætið með sambal maukinu, lime og salt eftir þörf. Mixið súpuna með töfrasprota eða í matvinnsluvél. Bætið út í sýrða rjómanum, tsk eða msk út í hverja súpuskál.
Hellið í skálar og sáldrið ferskum kóríander yfir og graskersfræunum

Góða helgi!

2007-10-12T10:29:00.000-07:00

Það hefur ekki verið mikið eldað á þessu heimili síðustu vikuna. Litla fröken er búin að vera veik síðan síðastliðinn laugardag, litla skinnið og við foreldrarnir á kafi í vinnu.
Ráðstefnan sem ég er að skipuleggja leggst bara nokkuð vel í mig en ég skal þó alveg viðurkenna að ég hlakka mjög til þegar hún og Airwaves eru afstaðin. Þá ætti að komast á venjulegt heimilislíf á þessum bæ. Þá verður sko eldað fullt!

Þessar myndir urðu í raun afgangs þegar Spánarmyndir voru settar inn á síðuna hennar Sögu þannig að þær fá bara að fljóta með hérna.
Góða helgi!

Það var nú frekar huggulegt að elda í stóru eldhúsi, horfa út í garðinn og fá heitan blæ á sig

Saga kippti sér ekkert upp við það þegar Steini og Philip grilluðu hverja steikina á fætur annarri

Steini kryddar kanínuna

Mýrún vildi hjálpa pabba sínum

Svo huggulegt að borða úti í garði

Kanínan krydduð og góð,já, mér fannst þetta pínu merkilegt

Annan daginn var boðið upp á kolkrabba en Steini og Brynja eru miklir matgæðingar og það var mikið rætt um matargerð

Hnetusósan hennar Sollu

2007-10-08T15:20:00.000-07:00

Á föstudaginn var komu Karlotta systir og Kiddi í mat og pössuðu svo Sögu á meðan við foreldrarnir skelltum okkur á tónleika. Það voru tortillur fylltar með spínat- og skyrblöndu, þarf að taka mynd af því og gefa upp þá uppskrift, geri það næst.

Ég verð að viðurkenna að það hefur valdið mér pínu kvíða að hafa fallist á að gefa uppskrift í einu blaðana um daginn og þá gefa upp bloggsíðuna, hafði einhvern veginn ekki hugsað út í að þá myndu væntanlega fleiri "ókunnugir" kíkja hérna inn. Hugsanir eins og hvort ég hafi skrifað eitthvað asnalegt og að það séu málfræðivillur úti um allt hafa gert vart við sig en núna er ég aðeins rólegri og held mínu striki, vitandi það að ég er kannski ekki besti kokkurinn, penninn, eða sérstaklega sleip í íslensku en ég hef gaman af þessu og á meðan svo er þá er bara um að gera að halda þessu áfram, og einmitt það, hérna er auðveld en góð máltíð sem er auðvelt að matbúa. Þið sem hafið ekki prófað hnetusósuna úr grænu Hagkaupabókinni, vá, þið vitið ekki af hverju þið eruð að missa, hún er rosaleg!

Buff með rótargrænmeti og hnetusósunni hennar Sollu
fyrir 2

2-4 grænmetisbuff (Þessi frá Móður jörð eru vinsæl hjá okkur)
Eitthvað gott salat

Rótargrænmeti

1 rófa
1 rauðrófa
2 gulrætur
þurrkað timjan
Salt og pipar

Flysjið rófur og rætur, skerið í jafna bita, skellið í smurt form, skvettið ólífuolíu yfir, kryddið með salti, pipar og timjan. Best er að nota sjávarsalt, nýmalaðan pipar og munið að nudda timjanið með fingrunum áður en það fer út í, það dregur fram bragðið í því.

Hitið í ofni í 30-60 mín á 200°. Það fer hreinlega eftir hvernig þú vilt hafa áferðina á þessu og svo er ofninn minn dálítið gamall og ég þarf yfirleitt að hafa allt sem ég geri lengur en aðrir í ofninum.

Hnetusósan hennar Sollu

2 dl hnetusmjör
2dl sjóðandi vatn
3 msk Tamarisósa (getið notað venjulega soya)
4 döðlur
hálft búnt kóríander
3 rif hvítlaukur
1-2 msk sítrónusafi
1/2 búnt kóríander
1/4 tsk cayenne pipar

Setjið hnetusmjörið í matvinnsluvél, hellið vatninu útí og láitð þetta blandast vel. Saxið döðlurnar smátt og pressið eða saxið hvítlaukinn. Bætið út í og blandið vel. Maður getur hitað þetta upp en það er ekki nauðsynlegt.

Cashewhnetu Paella

2007-10-04T13:48:00.000-07:00

Þessi réttur er dálítið öðruvísi, ýmis brögð sem takast á, fallegir litir og úr verður skemmtileg blanda. Ekki láta langa uppskriftina hræða ykkur, þetta er alveg þess virði og alls ekkert flókið. Það er alltaf pínu áskorun að gera nýja rétti en annað skiptið verður léttara og svo er bara svo gaman að prófa eitthvað nýtt, alveg nauðsynlegt fyrir sálartetrið. Þessi verður á boðstólnum á mínu heimili um helgina. Góða helgi!!
Ps. Það væri gaman að vita hverjir eru að sniglast hingað inn…

Cashewhnetu Paella

2msk olía
1 msk smjör
1 rauður laukur, saxaður
150 g arborio grjón
1 tsk turmeric
1 tsk cumin
½ tsk chili duft
3 hvítlauksrif
1 grænn chili, skorin smátt
1 græn paprika, skorin í teninga
1 rauð paprika, skorin í teninga
85 g baby maís, skornir í helming á lengdina
2 msk svartar ólífur
1 stór tómatur, i teningum
450 ml grænmetissoð (ca.1 teningur)
85 g cashew hnetur (helst ósaltaðar)
55g frosnar grænar baunir
salt og pipar
2 msk steinselja
örlítill Cayenne pipar
ferskar jurtir til skreytingar

Gera
Hitið olíu og smjör á stórri pönnu eða í potti. Bætið útí lauk og eldið á meðalhita, hrærið viðstöðulaust í 2-3 mínútur eða þar til þetta er mjúkt.

Hrærið grjónum útí, turmeric, cumin, chillidufti, hvítlauk,chili, paprikum, babymaís, ólífum og tómötum, eldið á meðal hita, í 2-3 mínútur.
Hellið grænmetissoðinu yfir og fáið upp suðu. Lækkið hitann og látið malla í 20 mínútur, hrærið oft í .
Bætið cashew hnetunum og baunum útí, látið malla í 5 mínútur til viðbótar, hræra í við og við. Bragðbætið með salti og pipar og bætið svo steinseljunni útí og chayenne piparnum. Skreytið með ferskum jurtum. Verið ykkur að góðu!

Rauðrófupottur

2007-09-29T15:31:00.000-07:00

Kannski ekki besta myndin í heimi...

Ég elska rauðrófur, þær eru svo bragðgóðar. Fékk fyrst æði fyrir þeim eftir að að vinir okkar, Jonas og Jelena, buðu okkur í rússneska rauðrófusúpu fyrir nokkrum árum í Gautaborg. Síðan þá er ég oft að skoða og leita eftir uppskriftum sem innihalda rauðrófur, endilega sendið mér tips ef þið hafið einhver. Smá fróðleikur:

Why Is Beetroot Healthy?
Declared by health experts as a ‘superfood’, you can eat beetroot with a clear conscience because it’s:
Virtually fat free – there are only 36 calories per 100g
Rich in iron – good for tiredness and anaemia
Rich in folic acid
A good source of vitamins (A, B and C) and minerals (calcium, phosphorus, potassium, magnesium)
High in fibre
And it has antioxidant properties.
Does Beetroot Make Us Happy?Recent research has declared beetroot a ‘mood’ food. Betaine found in beetroot is known to help us relax and make us feel good. Whilst recent press coverage has labelled it as a ‘sexy’ vegetable – containing high levels of the mineral boron which is thought to affect the production of sex hormones.

Rauðrófupottur

1 msk. ólífuolía
1 laukur, í þunnum sneiðum
1-2 hvítlauksrif
1 rauður chililaukur (má sleppa)
1 1/2 tsk. cumin, malað
1/2 tsk. túrmerik
1/2-1 tsk. salt
1/8 tsk. cayennepipar
3 meðal stórar rauðrófur, afhýddar og skornar í litla bita
1 sæt kartafla, afhýdd og skorin í litla bita
1/2-1 dós kókosmjólk
nokkrar þurrristaðar kókosflögur til að skreyta með (má sleppa)

Gera:
Mýkið laukinn, hvítlauk og chili í olíu í um10 mín. en passið að þetta brenni ekki. Kryddið og bætið rauðrófum, sætum kartöflubitum og kókosmjólk útí og sjóðið í minnst 1 klst. Skreytið að lokum með þurrristuðum kókosflögum.

Quinoa réttur

2007-09-27T07:32:00.000-07:00

Mig minnti endilega að ég ætti mynd af þessu, en finn enga svo þetta fær að fljóta í staðinn en þarna er ekki búið að blanda korninu saman við annars ofnsteikt grænmetið..

Þessi réttur er orðin mikið uppáhald á þessu heimili! Ekki skemmir fyrir að hann er bara mjög hollur. Quinoa kornið er upprunnið í S-Ameríku og var aðalfæða Inkanna. Það er glútenlaust og mjög næringarríkt. Það er sérstaklega mikið af prótíni (því mjög gott fyrir grænmetisætur) í quinoa en einnig er það ríkt af járni, fosfór, b-vítamínum og e-vítamíni. Það þarf stuttan suðutíma sem er gott fyrir okkur sem þykjumst alltaf vera svo upptekin:)

Hérna er uppskriftin:

4dl quinoa korn
vatn
örlítið smjör(ég nota ólífusmjör)
1-2 msk basilíka, þurrkuð eða fersk
1-2 msk steinselja, þurrkuð eða fersk
4 hvítlauksrif
1 blaðlaukur
2 vænir kvistir spergilkál
1 lítið blómkálshöfuð
2-3 gulrætur
3msk ólífuolía
4 tsk grænmetiskraftur
rifinn ostur og jafnvel smá paramesan (en ekki hvað)

Gera:
Setjið quinoa í pott, ásamt 8 dl af vatni og 1-2 grænmetisteningum. Hleypið upp suðu og látið svo malla í 15 mín. undir loki. Bætið þá við örlitlu smjöri, ásamt kryddjurtunum og pressuðum hvítlauk.(Ef þið viljið nota ferskt chili, þá er gott að bæta því í hér)

Skerið niður grænmetið. Gott er að léttsteikja það eða snöggsjóða áður en því er blandað saman við quinoað í eldföstu smurðu móti. Ég nota hreinlega það grænmeti sem til er, það er gott að nota papriku, tómata, chili, zuccini, ólífur, sólþurrkaða tómata eða bara það sem hugurinn girnist. Ath að aðeins þarf að forsjóða "hart" grænmeti. Blandið sem sagt öllu saman, stráið ostinum yfir og hitið á 180-200 gráðum í ca. 20 mín. Kryddið með salti og pipar. Berið fram með góðu salati

Það má gjarnan nota aðeins meiri vökva ef þetta er þurrt. Um daginn átti ég jalapeno ost í ískápnum og muldi hann þá í, það var mjög gott en kannski ekki eins heilsusamt en það er nú allt í lagi:)

Hvaða land ertu?

2007-09-23T10:17:00.000-07:00

Það er alltaf svo gaman að taka svona próf, sérstaklega þegar maður á að vera að vinna...taktu prófið og láttu mig svo endilega vita hvaða land þú ert. Ég tók líka "Animal" quiz og reyndist vera dúfa..

You're Mexico!

While some people think you're poor and maybe a little corrupt, you
know where it's at, enjoying good food and nice beaches. You like to take things a
little slower than those around you, and you really wish the air were cleaner, but sometimes
compromises must be made. For some reason, Chevrolet keeps trying to sell you Novas
as well, even though they don't really go.
Take the Country Quiz
at the Blue Pyramid

Jæja, er polentubakan orðin dálítið þreytt...

2007-09-22T02:52:00.000-07:00

Er búin að vera á leiðinni að setja inn nýja færslu alveg rooosalega lengi!
Hvar á maður að byrja eftir svona langt bloggfrí, kannski örstutt hvað er búið að drífa á daga mína.
Við, litla fjölskyldan skelltum okkur í 2 vikna yndislegt frí til Marbella á suður Spáni. Vinir okkar, Þorsteinn (Red), Brynja og dóttir þeirra, Mýrún tóku rosalega vel á móti okkur og þetta var þvílíkt huggulegt, risahús, við með okkar eigin álmu, risastór og fallegur afgirtur garður sem var lýstur upp á kvöldin, yndisleg sundlaug. Þetta allt með frábærum félagskap, góðu veðri, góðum mat og fullt af góðu rauðvíni og hvítvíni, bara getur ekki klikkað! Mun setja inn myndir sem fyrst.

Þegar heim kom tók alvara lífsins við, ég tók að mér verkefni og Saga byrjaði hjá yndislegum dagmömmum. Hún er búin að vera í 3 vikur í aðlögun, skulum bara segja að hér sé lítil mömmustelpa á ferð. Í gær var hún reyndar alveg frá hálfníu til tvö, en blessunin neitaði að þiggja bæði vott og þurrt, hmm. Þetta tekur dálítið á mömmuna.

Já, verkefni, ég er búin að vera að vinna ýmis verkefni fyrir Útflutningsskrifstofu íslenskrar tónlistar (ÚTÓN) Setti saman geisladiskinn Iceland Airwaves Eruption sem hefur að geyma lög frá 17 íslenskum artistum og var dreift víða í Bandaríkjunum á helstu útvarpstöðvar og þá sem hafa með tónlist að gera, einnig verður hann seldur sem imix á iTunes.

Í framhaldi af því var ég ráðin í að gera video podcast í tengslum við diskinn, ég og Helga vinkona unnum það saman, sjá hérna.
Útkoman af videóinu leiddi til þess að við vorum ráðnar til að gera annað podcast með John Kennedy, útvarpsmanninum knáa frá xfm í London, þar sem hann kom til Íslands yfir helgi og tók viðtöl við ýmsa, ma. við LayLow og Mugison, tékkið á þessu: JK Podcast

Er svo núna verkefnisstjóri/skipuleggjandi fyrir ráðstefnu sem fer fram í október, undir nafninu " Who is in control?" Útflutningsskrifstofa íslenskrar tónlistar (ÚTÓN)(www.icelandicmusic.is) stendur fyrir ráðstefnunni í samvinnu við Útflutningsráð og Nordic e-Music.Markmið ráðstefnunnar er að fjalla um það helsta sem er að gerast í markaðssetningu á stafrænum miðlum. Einnig verður fjallað um hvort Ísland geti orðið prufumarkaður fyrir nýtt viðskiptamódel um efnisdreifingu á netinu.

Nóg um þetta, er næstum tilbúin með 2 uppskriftafærslur, góðan rétt með quinoa grjónum og svo rauðrófupottrétt, ætla svo loks að gera tenglalista og sortera uppskriftirnar, stay tuned..

Við Saga, í garðinum á Marbella, held að hún sé sætasta fótboltastelpa í heimi!

Það kemst sko engin bolti framhjá þessari skottu!

Fór á tvenna tónleika með Frans Ferdinand síðustu helgi, algjör snilld og fór líka í frábært matarboð með þeim félögum, stundum er gaman að eiga eiginmann í bransanum, þá hittir maður skemmtilegt fólk, hmm, reynum að muna þetta fram að Airwaves, þegar hann er í vinnunni öll kvöld til miðnættis. Þetta er Alex, söngvarinn, hann er nú dálítið töff..

Moi, Helga, Allý og Myrra
Fórum til Stykkishólms yfir verslunarmannahelgina, skvísurnar í ferðinni skelltu sér á bæjarbarinn, man bara ekki hvað hann heitir, anyone?

Hjónin á góðri stundu, alltaf sæt saman:)

Anna Hildur, framkvæmdastýra Útóns, Wendy blaðamaður, ég, John Kennedy og Helga
Tekið í eftirpartíi FL Group eftir Norah Jones, frekar skondið að sjá alla bankaplebbana, við
reyndum að sjálfsögðu að rokka partíið aðeins upp!

Polentubakan góða

2007-08-06T11:30:00.000-07:00

Gerði þessa böku fyrst úti í Gautaborg, man að Anna Linda var í heimsókn og einnig Boris, vinur okkar frá Stokkhólmi. Ég hef áður gefið upp uppskrift þar sem notuð eru polenta grjón. Þetta eru fín, gul nokkurs konar grjón, til í betri búðum og heilsubúðum. Þetta er skemmtileg tilbreyting.

Polentubakan góða

2 laukar
1 hvítlauksrif
3msk ólífuolía
1/2 l grænmetissoð
2 dl polenta
2 dl rifinn ostur
1 msk fínt hakkað meriam (má sleppa)
5 tómatar, gott að nota plómutómata
1 kúrbítur
1/2 búnt basilika, fersk
1-2 tsk sítrónusafi
salt, svartur pipar
smá cayenne pipar
ferskt meriam eða basilika til skreytingar
Mér finnst svo gott að láta parmesan yfir en má sleppa

Gera
Hakkið hvítlauk og lauk, hitið olíuna og steikið helminginn af lauknum þar til hann er mjúkur. Hellið þá yfir grænmetissoðinu yfir laukinn og bætið svo polentunni útí. Fáið upp suðu, hrærið í reglulega á meðan. Slökkvið á hitanum. Hrærið í helmingnum af ostinum og af meriam. Látið standa á plötunni í ca. 10 mín. Smyrjið ofnfast mót og setjið ofninn á 200 gráður(ekki enn búin að finna gráðumerkið:)) Hellið polentunni í formið, þrýstið og látið kólna.

Skerið tómata í teninga, léttsteikið þá ásamt restinni af lauknum í ca. 2 mín. Kryddið með salti, pipar og cayennepipar. Takið pönnuna af plötunni.

Rífið kúrbítinn gróft, kryddið með salti og pipar. Dreifið þessu yfir polentuna. Strimlið basilikuna og blandið henni út í tómata- og osta blönduna og dreifið henni ofan á kúrbítisblönduna.
Hitið í ofninum í ca. 30 mín. Berið fram með góðu salati.

Ég er alveg sjúk í svona grænar strengjabaunir eða hvað þær nú heita, bara hita þær í sjóðandi vatni í svona 5 mín, leyfa þeim aðeins að kólna, skella svo smá ólífuolíu, sítrónuskvettu og sjávarsalti yfir, yummie

Kominn tími á nýtt blogg sko..

2007-07-31T16:00:00.000-07:00

Villa Bergshyddan, húsið fína sem við fengum lánað, þetta er eins og bústaður úti á landi en er í raun á besta stað í Stokkhólmi.

Huggulegt með Christoph og Kristinu úti á veröndinni

Frá svefnherberginu í húsinu, bak við glerið á veggnum er upprunalegur veggur frá um 1800.

Húsið sjálft var mjög fallegt en húsgögnin ekki alveg í stíl, þó ekkert hræðileg sko:)

Frá húsinu...

Máltíð á Midsommarafton, síld, Lax, kartöflusalat með graslauk, hrökkbrauð, snaps..allt mjög traditional og svo paj, salat og halloumi ostur...namm, svo skemmtilegt kvöld

Setið á veröndinni í húsinu sem við höfðum í Stokkhólmi á Midsommar kveldi..

Ég, Katarina sem er besta vinkona mín í Sverige og Saga sæta

Setið úti á veröndinni á Lagnö hjá Jóhönnu frænku, sjá fleiri myndir á Sögu síðu

Jóhanna föðursystir mín er algjör meistari þegar kemur að því að gera gott paj!

Uppáhalds kaffihúsið mitt í Gautó, Cafe Zenit

Í mat heima hjá Karin, vinkonu minni
Vinir okkar í Gautó, Hannah, Rasmus, Eliah og Noah, yndisleg fjölskylda!

Fórum á yndislegan tælenskan stað í Stokkhólmi, namm

Christoph vinur minn að dj-a, þessi dökkhærði

Bibelskolan, hljómsveitin mín, sameinuð aftur!

Hjónakornin á leið í Gröna Lund
Daginn eftir að við komum heim, þá fór ég með Sögu upp í sumarbústaðinn okkar við Þingvallavatn þar sem við hittum Katrínu og Svanborgu frænkur okkar, mennina þeirra og börn; Sunneva Rán, Þórunn Salka, Rakel Eva, Pétur Ari og Saga, svo sæt öll saman!!!
Við Anna Linda höfðum það kósý á svölunum, sumarlegt couscous salat með öllu sem fannst í ískápnum, rauð vínber voru alveg málið!
Frá þrítugsafmæli Eldars fyrir fjölskylduna, varð að fá að fljóta með..

Jæja, ég var farin að sakna þess að blogga en afþví að ég hafði ekki gert það svo lengi, þá vissi ég varla hvar ég ætti að byrja og hef átti erfitt með að koma mér af stað.
Ákvað því að hafa þetta ekkert flókið, skella inn nokkrum orðum og myndum með.

Í stuttu máli er þetta helst:
Hafði það voðalega gott í fríi okkar til Svíþjóðar. Hittum marga góða vini og nutum lífsins.
Eins og margir fengu að heyra (ég var pínu vonskvikin) þá var veðrið fremur leiðinlegt svo að allar hugmyndir um að synda og flatmaga við vötn og haf urðu að engu og flesta daga var maður á þrammi í rigningunni, að hitta fólk, borðandi eða í verslunum. Það var mjög fínt en ég kom ósköp þreytt heim. En get ekki kvartað, eigum jú eina Spánarferð framundan og þar ætla ég að slaka á.
Það var gaman að ferðast með hana Sögu mína, maður er nú pínu montinn af henni, enda er hún mjög duglega að heilla fólk með brosinu sínu, hún nýtur þess að gera nýja hluti, hitta nýtt fólk og bara fá að sitja í kerrunni sinni og horfa í kringum sig.

Síðustu 3 vikur hef ég svo verið að vinna mitt fyrsta verkefni eftir barnsburð, er að gera verkefni fyrir Útón, mun segja betur frá því en það er ótrúlega gaman og spennandi!
Skelli inn nokkrum myndum sem hafa safnast upp, ætla svo að vera aðeins duglegri við bloggið.

Andlegt á Snæfellsnesi

2007-06-12T07:35:00.000-07:00

Við litla familían skelltum okkur á Snæfellsnes um Hvítasunnuhelgina. Planið var að vera 2 nætur, þá fyrri á Arnarstapa eða undir honum og svo þá seinni á Grundarfirði. Við gistum á Snjófelli, litlu gistiheimili/svefnpokapláss og var það bara mjög huggulegt og ekkert svo dýrt, mæli með þessu! Herbergið okkar var mjög krúttlegt, rúm í sitthvorum endanum og góður andi. Og talandi um það, Snæfellsnes er jú rómað fyrir að vera andlegur staður og gott ef ekki herbergið var pínu þannig...þið dæmið...
Læt svo fleiri undurfallegar myndir frá þessari frábæru ferð, drífið ykkur, stutt að fara!

Undir Arnarstapa, við gistum í húsinu með græna þakinu..Andafæla í herbergisglugganum, já, dálítið andlegt

Smá andó..

Hmmm...

Risotto Primavera

2007-06-09T06:14:00.000-07:00

Eldar minn varð þrítugur þann 29.maí. Það var ekki fyrr en núna um helgina að það var haldið upp á það með fjölskyldunni og svo næstu helgi með vinum.
En auðvitað var eldaður góður matur handa afmælisbarninu og þar sem Eldar er mjög hrifin af risotto, þá ákvað ég að gera nýja uppskrift sem mig hafði lengi langað til að prófa. Vá, sé ekki eftir því, þetta var rosalegt!! Smá vinna en svo þess virði! Fólki vex oft í augum hversu mikið getur verið í grænmetisréttum, en látið það ekki hræða ykkur og þetta er í raun ekki dýrt miðað við að þetta er veislumatur, getið keypt flest í bónus og svo endað td. í Hagkaup en það er æðislegt að skoða og versla grænmeti og ávexti þar!

Risotto Primavera
fyrir 4-6

225 gr ferskur aspas
4 msk ólífuolía
175 g strengjabaunir, skornar í ca 2,5cm bita
175 gr kúrbítur, skorið í fjórðunga (velja mjóan)
1 laukur, fínt skorin
2 hvítlauksrif, fínt skorin
350 gr arborio eða carnaroli hrísgrjón
1,5 l grænmetissoð
4 vorlaukar, skornir á lengdina, ca. 2, 5 cm
salt og pipar
4 msk smjör
115 gr paramesan
2 msk graslaukur, saxaður
2 msk rifin basilika (ég notaði rauða basiliku sem ég fékk í hagkaup, mjög smart)
vorlaukur til að skreyta með

Gera:
Skerið endana af aspasnum, skerið svo í helming eða þrjá bita, fer eftir stærð.

Hitið 2 msk af ólífuolíu á stórri pönnu eða í potti og fáið upp háan hita. Skellið út á aspasnum, baununum og kúrbítnum og snöggsteikið í 3-4 mínútur eða þangað til komin er fallegur ljósgrænn litur og grænmetið hefur mýkst. Setjið til hliðar.

Hitið restina af olíunni í stórum potti á miðlungshita. Látið laukinn út í og mýkið í 1 mín.
Bætið hvítlauk út í og eldið í 30 sek. Bætið svo út í grjónum og eldið og hrærið í ca 2 mín eða þangað til grjónin verða hálf gegnsæ og ötuð í olíu.

Hellið yfir um 1/6 (250 ml) af soðinu, hrærið stanslaust þangað til vökvinn er gufaður upp og bætið þá alltaf útí ca. 1 dl af soðinu, látið gufa upp og svona koll af kolli, aldrei láta grjónin verða alveg"þurr". Þetta tekur um 20-25 mín.

Bætið út í grænmetinu og eigið þá eftir örlítið af soðinu og eldið í um 2 mín. Kryddið með salti og pipar. Hrærið út í paramesan, graslauk og basil.

Takið af hitanum og látið standa í 1 mínútu, berið svo strax fram og endilega skreyta með vorlauk og basiliku.

Verði ykkur að góðu!

Gauti bróðir, listamaðurinn

2007-06-06T16:46:00.000-07:00

Gauti bróðir er frábær listamaður og yndisleg manneskja. Hann er að vinna í Ásgarði sem er frábær verndaður vinnustaður og þar hafa hæfileikar hans fengið að njóta sín en hann sker út í tré/við. Hann hefur selt heilmikið af list sinni en ágóðinn af því rennur allur til Ásgarðs og ég mæli með að kíkja þangað, þeir eru td. alltaf með jólakaffi í byrjun desember þar sem er opið hús og einnig hafa þeir selt í Kringlunni, ýmislegt útskorið og það er bara svo góður andi yfir þessu öllu.

Á dögunum fór fram "List án landamæra" sem er listahátíð sem á að vekja athygli og koma á framfæri list fatlaðra. Í tengslum við þá frábæru hátíð voru fengnir nokkrir fatlaðir listamenn til að starfa saman með öðrum listamönnum og afraksturinn sýndu þeir í Norræna húsinu. Gauti vann með listamanninum Finnboga Péturssyni sem vinnur aðallega útfrá hljóði og hefur ma. unnið með Ghostigital .

Hér fylgir með hvað Gauti sagði um samstarfið:
"Það var mjög gaman að vinna með Finnboga en ég verð að játa það að þetta var mjög skrítin og dálítið óþægileg tilfinning að hafa míkrafóninn í eyranu þegar ég var að vinna þessa hluti mína, yfirleitt er ég mjög einbeittur og loka á öll hljóð en þarna glumdu öll utanaðkomandi hljóð í eyranu mínu og trufluðu mig. Þegar ég byrja á einhverjum hlut þá er ég oft með fyrirfram ákveðna hugmynd sem ég vinn eftir en oft í miðju verki tekur hluturinn breytingum stundum vegna mistaka minna en einnig vegna þess að viðurinner á annari leið en ég og stýrir mér að einhverju allt öðru og oft mjög skemmtilegu verki."

Karabískur Hrísgrjónaréttur

2007-06-06T08:58:00.000-07:00

Hér var smá mömmuhittingur þar sem Edda, Ylfa og Laufey mættu með krílin sín, þau Ívar Óðinn, Heklu og Hrafnkel Núma, sem er nýjasta krílið í hópnum. Alltaf gaman að spjalla saman og gefa góð ráð, já og bara dást að litlu krúttunum.

Var einnig með mömmurnar sem ég kynntist í foreldrafræðslu í heimsókn, bauð þar upp á tabbouleh sem ég gert hér áður og tók ekki mynd af. Brjálað að gera hjá þessum mömmum sko..

Skellti í auðveldan rétt sem ég hafði ekki gert áður. Hann heppnaðist bara mjög vel en ég held að það mætti vera meira af engiferi, kókosmjöli og kóríander en gefið er upp í uppskriftinni. Gæti örugglega verið sniðugt að gera fullt af hrísgrjónum ef þið á annað borð eruð að gera þau og nota svo daginn eftir restina og bæta hinu sem ég gef upp út í.

Karabískur hrísgrjónaréttur fyrir 4

1 laukur
1 rif hvítlaukur
1 msk ólífuolía
2 tsk engifer, ferskt
2 msk kókosmjöl
1 tsk paprika
2 tómatar
250 gr hrísgrjón
1 dós nýrnabaunir
6 dl grænmetissoð
salt og nýmalaður pipar
Ferskur kóríander

Hitið olíuna, mýkið saxaðan laukinn og hvítlauk í smá stund. Bætið við rifnum engifer og bætið svo við paprikudufti og kókosmjöli. Skerið tómata í teninga og bætið í. Látið malla í 5 mín. Bætið í grjónum, baunum og grænmetissoði saman við og sjóðið í 15 mín. Kryddið með salti, pipar og kóríander. Berið gjarnan fram með brauði og salati.

Loksins loksins..

2007-06-06T08:42:00.000-07:00

Jæja, þá kom ég mér loks í blogggír á ný. Með hækkandi sól í maí (eitthvað annað en veðrið núna) þá einhvern veginn lagði ég niður öll skrif og varð mjög löt í matargerðinni. Það er búið að vera mikið að gera, skemmtilegir hlutir að gerast og bara gaman að lifa.

Ég er td. búin að fara á mjög skemmtilegt Vorblót þar sem hápunkturinn var Goran Bregovic, hér eru búin að vera tvö krílapartý, búin að fara á Snæfellsnes sem var ÆÐI, búin að fara í mjög skemmtilegt rauðvín og ostapartý, mjög huggulega skírn, flott en dálítið spes CCP partý, búin að vera á fullu í kundalini yoga, hitta fullt af ættingjum og kynnast skemmtilegu fólki:)

Og framundan er bara gaman gaman, Icelandic celebrity look alike innflutningspartý, ættingjabrunch og svo styttist í Stokkhólm, sumarbústaðarferðir, Stykkishólm, Malaga og fullt af kaffihúsaferðum með hana Sögu mína. Yndi. Alla vega, nú megið þið eiga von á þó nokkuð af færslum, búin að safna smá upp.

ps. myndin að ofan er svo sem ekkert merkileg, þetta er frá kosningavöku hérna á Skúló þar sem
allir mættu með sitt lítið af hverju, afhverju erum við ekki duglegri að gera svona, svo sniðugt að allir hjálpist að og úr verður veisla með lítilli fyrirhöfn

Rosalega sniðugt!

2007-05-25T16:05:00.000-07:00

Ég er ein af þeim sem held að ef við hlustum nógu vel á líkaman þá segir hann hvað er að, hvað okkur vantar osfrv. Ég td. verð helst að eiga gulrætur, svo langar mig stundum rosalega í brokkólí, sítrónu og nú í vikunni sellerí. Ég er viss um að mig hafi vantað eitthvað af efnum úr þessu grænmeti/ávöxtum. Eins fæ ég stundum rosalega löngun í hafragraut ef ég hef ekki fengið mér hann í nokkra daga. Svo auðvitað lendir maður stundum í smá stappi og td. hef ég haft óstjórnlega mikla löngun í sætindi síðasta mánuðinn, en ég kenni nú bara brjóstagjöf og hormónastarfsemi um það en úff, ekki alltaf létt að standast löngunina:)

Eins og svo mörgum, þá finnst mér fótanudd alveg yndislegt en suma daga þá bara gjörsamlega verð ég að fá fótanudd. Vildi því aðeins kynna mér svæðanudd því stundum vil ég að vissir partar séu nuddaðir frekar en aðrir, tærnar oft viðkvæmar og svona...

Fann þessa síðu, rosalega sniðug, skoðaðu þetta!

Löt í eldhúsinu..

2007-05-21T15:16:00.000-07:00

Hef verið löt í eldhúsinu síðustu daga. Í stað þess hef ég aftur á móti verið mjög dugleg að sækja tónleika og gera ýmislegt skemmtilegt. Glæsilegt Vorblót Hr. Örlygs er nú yfirstaðið.
Á fimmtudagskvöldið kíktum við litla fjölskyldan út að borða með Malísku stórsöngkonunni, Oumou Sangare og hljómsveit hennar. Þetta var allt mjög elskulegt fólk og Saga brosti sínu breiðasta. Rétt áður en við fórum út úr húsi sá ég viðtal við hana í sjónvarpinu, mikið máluð og glæsileg en ég er svo mikill lúði að ég fattaði ekki að hún sæti beint á móti mér í matnum því þar var hún ómáluð og er reyndar mun sætari í eigin persónu heldur enn í sjónvarpinu og ég hélt bara að þetta væri einhver bakraddana og að Oumou sjálf hefði ekki mætt í dinnerinn. Mjög skondið þegar Eldar tók upp geisladisk með henni og ég lagði saman tvo og tvo...lúða jóns....hún er alveg yndisleg og mjög barngóð, vildi endilega fá að halda á Sögu sem unni sér vel í fanginu á henni.
Eftir matinn sótti ég mömmu sem var svo góð að vera hjá litlu skvís og ég skellti mér niður á Nasa í klukkutíma og þvílík rödd sem hún hafði!!

Jæja, svo kom föstudagur og við boðin í afmæli hjá Hr. Örlygi sjálfum eða honum Steina en hann var fertugur kallinn og því boðið í veislu.

Gleðilegan kosninga-og kræsingadag!

2007-05-12T04:51:00.000-07:00

Hirsibuff, kartöflumús og spínatbeð með jarðaberjum, sesamfræum og balsamico

Rússnesk Rauðrófusúpa

Kasjúhnetu Paella

Jæja, þá er þessi dagur runninn upp og það er ekki laust við smá spennu í manni. En samt er maður líka hræddur um að allt verði bara nákvæmlega eins.

Ég hef verið fremur löt við að matblogga en það hefur líka verið mikið að gera. Ég er yfirleitt með myndirnar af matnum tilbúnar en leiðist dálítið að skrifa inn sjálfar uppskriftirnar sem oftar en ekki eru á ensku eða sænsku.

Ég skelli hérna inn þremur myndum af réttum sem hafa verið á boðstólnum undanfarið, bara svona til að þið fáið smá vatn í munninn. Uppskriftirnar af þeim koma svo seinna, þá sérstaklega ef einhver sýnir því áhuga:) Eigið góðan dag og kvöld!!!

Risessan

2007-05-12T04:33:00.000-07:00

Eins og svo margir aðrir, þá dreif ég mig niður í bæ í gær, nánar tiltekið upp að Hallgrímskirkju, til að líta Risessuna augum. Mér finnst þetta frábært framtak, list sem vekur nánast athygli allra og sjaldan hefur örugglega einhver viðburður hinnar ágætu Listahátíðar fengið aðrar eins viðtökur.

Sögu fannst þetta bara mjög spennandi og var hin sprækasta.

Risessan er 8 metra há, engin smásmíði og mér varð hugsað til Aðskilnaðarmúrsins í Palestínu, sem er einmitt 8 metra hár og guð má vita hversu langur! Við í Ísland-Palestína höfum einmitt ákveðið að í ár munum við seta fókus á þetta hræðilega mannvirki sem Múrinn er!

Yfir 10 milljónir barna undir 5 ára deyja árlega!

2007-05-08T02:44:00.000-07:00

Þetta er rosalegt! Ég er því miður hrædd um að margir geri sér ekki grein fyrir þessu og hversu ótrúlega gott við höfum það. Hér er að finna greinina, sem er á mbl.is, í heild sinni.
Ef þú átt þess kost, þá mæli ég td með að styrkja SOS barnaþorp eða Unicef, þekki til og veit að lítil upphæð skilar sér margfalt!

Charles MacCormack, forseti Save the Children, segir að yfir 10 milljónir barna undir 5 ára aldri látist árlega, eða nærri 28 þúsund á dag, langflest í þróunarríkjunum. Leiðir til að draga úr barnadauðanum séu ódýrar en þar er um að ræða bólusetningar, flugnanet og að grafa brunna. Hafi fjöldi mæðra og barna ekki aðgang að slíku. Talið er að 9 af hverjum 10 mæðrum sem búa í Afríku sunnan Sahara missi barn á ævinni.

Með sól í hjarta..

2007-05-07T17:44:00.000-07:00

Er farin að hlakka mjög svo til sumarsins og hef verið að rifja upp hinar ýmsu góðu sumarstundir. Það er svo gaman að taka fram sumarfötin, vona að maður geti notað þau eitthvað hérna heima:)
Og þess ber að geta að við fjölskyldan förum til Stokkhólms í júní, þar sem við verðum með íbúð og munum eyða tíma með frábæru fólki og svo förum við í sumarhús með góðu fólki til Malaga á Spání í ágúst. Og einnig verður farið eitthvað út á land, svo frábært sumar framundan hjá okkur, jeiii!!

Þar sem ég hef loks látið verða af að vera með svona vídeó reikning, þá langar mig endilega að deila með ykkur mínútubrotum frá brúðkaupsferð okkar Eldars, í ágúst 2005 en þá fórum við til Barcelona og Cadaques, sem er yndislegur staður norðanlega í Katalóníu og er hvað mest þekktur fyrir að Salvador Dali bjó þar. Mæli eindregið með þessum stað!

Endilega kíkið á þessi tvö vídeóskot: Í Barcelona, skemmtilega hallærislegt og Cadaques, paradís á jörðu

Bland í ofninn..

2007-05-07T05:33:00.000-07:00

Gerði þetta um daginn, átti eitthvað svo mikið af grænmeti sem var á síðasta sjens. Þessu var nú ekki ætlað inn á síðuna en þar sem ég heyrði í Eldari segja ummmm, namm, yfir matnum, þá rétt náði ég mynd af þessu og skelli þessu því hér inn. Það má örugglega nota það sem þið eigið í ísskápnum.

Bland í ofninn
3-4 stórar kartöflur, skrældar og léttsoðnar
1 blaðlaukur
3-4 gulrætur
3-4 tómatar
1 brokkólíhöfuð
3-4 tómatar
1 poki rifinn ostur
brauðrasp
4 egg
1 dl matreiðslurjómi (cremofino)
2 dl léttmjólk
2 msk tómatpuree
1-2 tsk sambal olek (chili mauk, fæst í Nóatúni og Hagkaup)

Skerið grænmetið, ég lét svo kartöflubitana út í sjóðandi vatn með salti í smá stund en passa að þær verði ekki mjög mjúkar. ég raðaði gulrótum, brokkólí og blaðlauk í botninn á smurðu formi, stráði svo yfir það brauðraspi og osti. Lét svo kartöflurnar yfir og að lokum raðaði ég tómatsneiðum yfir.

Blandið saman eggjum og vökva, pískið og bætið í salti, pipar og sambal olek/eða chili/chayenne pipar útí. Það er kannski betra að nota 1-2 dl af vökva í viðbót en við viljum hafa þetta í þurrari kantinum. Hellið blöndunni jafnt yfir. Skelli inn í ofn á 200 gráður, hafið inni í svona 30 mín. Takið þá út, stráið yfir brauðraspi og svo osti. Ég lét líka smá paramesan. Bakið í ca. 20 mín í viðbót eða þangað til þetta er búið að taka á sig smá lit.
Ég ætlaði að bera þetta fram með hýðisgrjónum en átti ekki til svo bar þetta fram með búlgum.

Saga nýfædd-Vídeó

2007-05-05T12:26:00.000-07:00

Testing, 1,2,3...ég er ekki mikil tækjafrík, sjáum hvort mér tókst að láta vídeóklippu af Sögu hérna inn. Ef vel tekst, þá megið þið eiga von á þó nokkrum vídeóum inni á síðunni hennar. Getum aðeins tekið upp einnar mínútu vídeó og eigum við þau ófá:)

Töff, er á topplista:)

2007-05-04T07:54:00.000-07:00

Já, ég er víst á topplista hjá Betunni:) Gaman það

Góða helgi kæru vinir og hinir!

Hafragúdís

2007-05-02T06:33:00.000-07:00

Ég fékk uppskriftina af Havre godies/ hafrasælgæti (hafragúdís) í Ica búðinni sem var hliðina á þar sem við bjuggum í Majorna í Gautó. Þetta hef ég gert ótal oft, stundum með smá breytingum ef ég á ekki allt í þetta og þetta er rosalega gott. Er alltaf á leiðinni að prófa að gera þetta á hollari hátt, td sleppa sykri og smjöri eða eitthvað svoleiðis..læt vita þegar það hefur verið gert en þangað til...

Þetta er mjög sniðugt sem tækifærisgjöf og ömmum og öfum finnst gaman að fá svona, þau eiga jú allt svo smart að gefa svona og kannski gott kaffi með, namm!

Hafragúdís

2 dl haframjöl
1/2 sesamfræ
100 gr smjör
1/2 dl sykur
1/2 dl síróp
2 msk kakó
1 dl cashew hnetur, muldar
2 msk kókos (má sleppa)

Gera:
Ristið haframjölið svo það gyllist, takið svo af pönnu. Ristið sesamfræin svo þau taki á sig smá lit, en passið ykkur, því þau brenna hratt. Bætið út í smjöri og þegar það er bráðið, bætið þá sykri, sírópi, kakói og á endanum hnetum.
Takið blönduna af plötunni og bætið út í haframjölinu. Látið svo alla blönduna í form, þrýstið henni niður,stráið kókosmjöli yfir allt eða að hluta til , leyfið henni að standa í ca. 5-10 mín. og skellið svo inni í kæliskáp.

Ég vil hafa þetta fremur þétt og hart en sumir vilja hafa þetta meira laust í sér. Skerið svo í bita. Ég hef líka skorið þetta í lengjur og á ýmsan hátt.

afmæli, part 3

2007-05-01T04:54:00.000-07:00

Anna Linda vinkona er yndisleg, rosalega skemmtileg, traust og góð. Þess vegna kom það svo sem ekki á óvart þegar hún gaf mér í afmælisgjöf (gaf mér meira að segja meira) að við færum út að borða tvær saman á Austur-Indíafélagið. Fórum í síðustu viku og það var alveg yndislegt. Og fórum meira að segja annað og fengum okkur "eftirdrykk" því Saga bara steinsvaf og pabbinn krafðist þess að mamman kæmi ekki strax heim. Þetta var ótrúlega gaman og við spjölluðum um heima og geima. Takk sæta mín fyrir þetta góða kvöld!! Með eru myndir sem Anna tók og ég fékk lánaðar frá blogginu hennar!

Foreldradinner

2007-04-23T13:21:00.000-07:00

Á laugardagskvöldið fyrir viku síðan fengum við hingað góða gesti, hina nýbökuðu foreldra, Bjarka og Laufey og litla kút, sem er alveg yndislegur, hvað skyldi hann eiga að heita? (Eldar/Eva= Elvar?)
Borðuðum með smá hléum (krílin þurfa líka sinn mat), salat, risotto og svo frábæran eftirrétt sem þau komu með, ber, makkarónur og hvítt súkkulaði í ofni, borið fram með ís, namm!!!
Þetta var ótrúlega gaman og svo fyndið eitthvað að vera þarna saman, foreldrarnir, haha. Nú verðum við að fara að haga okkur.

Salat með gráðosti
fyrir 4

Smá ruccola á hvern disk
4-5 tómatsneiðar, raðað ofan á ruccolað
1 tsk af litlum kapers á hvern disk
Rífið smá gráðost yfir hvern disk
Rífið eða klippið yfir hvern disk ferska basiliku
3-5 grænar ólífur (helst fylltar með möndlu) á hvern disk
saltflögur/sjávarsalt, pipar og skvettu af balsamic edik, já, á hvern disk:)

Sveppa og valhnetu risotto
fyrir 4

4 fínhakkaðir skallottulaukar (eða 2 litlir gulir)
4 hvítlauksrif, fínt hökkuð eða marin
ca 300 gr sveppir (hægt að nota blöndu, td. shiitake)
Smá klípa af smjöri og smá ólífuolía að steikja upp úr
6 dl aborio ris (risotto ris)
12 dl grænmetissoð (sjóðandi vatn og 2 teningar)
4-6 dl hvítvín (má sleppa og nota meira soð en þó betra með víni)
3-4 dl rifinn paramesanostur
3-4 dl hakkaðar valhnetur
Nýmalaður svartur pipar

Steikið lauk, hvítlauk og sveppi, án þess að það taki á sig lit, bætið út í rísi og steikið í smástund þannig að rísið verði næstum gegnsætt. Hellið soðinu yfir, smá og smá í einu og hrærið mikið.

Þegar vökvinn er farin, þá bætið meira út í, líka víni í bland við soðið. Hrærið alltaf í. Takið af eldavélinni eftir ca. 20-30 mín. Hrærið ostinum útí. (Rísið á að vera orðið "kremkennt" þegar ostinum er bætt í)

Bætið út í valhnetunum og bragðbætið með piparnum. (geymið nokkrar valhnetur til að skreyta ofan á , dreifið yfir smá osti og jafnvel smá steinselju)

Stelpukvöld

2007-04-22T16:38:00.000-07:00

Áttum yndislegt kvöld saman, ég, Anna Linda, Inga, Edda og Helga, Devitos pizza og svo geggjuð súkkulaðikaka sem Anna Linda gerði og kom með. Já, svona er kvöldin hjá okkur, bara það besta. Saga elskar að fá gesti, hún virðist sérstaklega félagslynd og blaðrar mikið...hmmm, er hún eitthvað að líkjast mér?

Afmælis og Bjarkartónleika partý

2007-04-20T04:32:00.000-07:00

Gjörið svo vel!

Þura og Edda, óléttar og sætar, oh hvað það verður gaman í ágúst!

Myrra og Helga

Spurning um að pósa, Anna, ég og Helga

Allý, Adda og Svanhvít

Tabbouleh, líbanskur réttur

Falafel, hummus og jógúrt/myntusósa

Kakan þótti mjög góð sem gerði mig stolta, aldrei þótt mikill bakari (Anna skreytti)

Annar í Páskum var annasamur dagur á þessu heimili.
Eldar svo að segja með símtólið límt við eyrað en hann var að skipuleggja Bjarkartónleikana.

Ég á fullu í eldhúsinu með Sögu, sem er orðin krakki, á mjöðminni. Ég var nefnilega með lítið matarboð, svona bæði af því að ég átti afmæli 7.apríl og svo var þetta svona fyrirpartý fyrir Bjarkartónleikana. Hefði viljað bjóða miklu fleirri stelpum en það verður bara næst.

Ég bakaði franska súkkalaðiköku og gerði mat með miðausturlanda brag, Tabbouleh
falafelog ýmislegt góðgæti með því, mjög sniðugt því þetta er hægt að undirbúa áður og bera fram kallt.
Þetta var pínu stress þar sem Eldar var svona upptekin og ég líka að fara í fermingu sem byrjaði kl.16 en mitt boð byrjaði kl.17. Sem betur fer á ég yndislegar vinkonur sem hjálpuðu til og gerðu allt fínt þannig að ég kom í raun hálftíma of seint í mitt eigið boð þar sem þær voru búnar að setja punktinn yfir i-ið! Takk elskurnar mínar!! Og takk Edda og tengdapabbi fyrir að gæta Sögu:) Tónleikarnir voru æði!!!!!!!

Tabbouleh
fyrir 6

2 1/2 dl búlgur
1 rauðlaukur
1/2 blaðlaukur
2 tómatar
1 rauð paprika(má sleppa)
1/2 gúrka (taka smá af miðju ef hún er mjög mjúk)
1/2 búnt steinselja
1/2 búnt mynta
1 sítróna (safi)
3msk ólífuolía
Ólífur (má sleppa)
Fetaostur (má sleppa)

Gera:
Látið búlgur í skál, hellið sjóðandi vatninu yfir, hrærið í og lokið. Látið standa í 3-5 mín og hrærið svo aftur, standa í ca 2 mín og hræra aftur. Hellið smá olíu yfir, salti og pipar og hrærið, látið kólna.

Skerið allt grænmetið mjög smátt, en það er sniðugt að taka til hliðar smá til skreytingar. Saxið smátt steinselju og myntu en skiljið eftir heil blöð til skreytingar.

Blöndið öllu saman við búlgurnar nema tómötunum, helst á grunnt og vítt fat.
Látið tómatana ofan á, skreytið með kryddjurtunum og svo er smart að skreyta líka með með allskonar ólífum og fetaosti en það er líka verið sniðugt að hafa það sér þannig að fólk geti bara fengið sér það ef það vill.

Ath! Maður getur alveg borðað þennan rétt einn og sér en ég er oftast með falafel með, hummus og pítubrauð sem ég sker í ferninga, pensla rétt með olíu og skelli í ofn í örskamma stund. Sniðugt að skella á suma ferningana sesam eða kúmen

Falafel

675gr kjúklingabaunir (ég nota 3 dósir án vatnsins)
1 rauður laukur, hakkaður
3 hvítlauksrif
100 gr brauðrasp
2 litlir rauðir chilli (eða þurrkaðir, 1-2 tsk)
1 tsk cumin (einhver með íslenska heitið á því?)
1 tsk kóríanderduft
1/2 tsk turmeric
1 msk ferskur kóríander og einnig smá til skreytingar
salt og pipar eftir hentisemi
1 egg til að pensla með

Gera:
Látið baunir, lauk, hvítlauk, rasp, chilli,ferskan kóríander og krydd í matvinnsluvél. Blandið í 30-45 sek, bætið út í salt og pipar. (Ég hef líka látið út í svona 1/4- 1/2 dl af jurtaolíu, svo þetta haldist betur saman)

Myndið bollur úr blöndunni, td á stærð við valhnetu/mozarkúlu. Ég bý til lengju úr blöndunni, þjappa henni og sker og skipti með hníf, svo þær verði svipað stórar. En kannski er það óþarfa smámunasemi. Einnig nota ég einnota hanska þar sem ég er dálítil pjattrófa:)
penslið með egginu.

Í uppskriftinni er manni sagt að hita olíu upp í 180 gráður eða þar til brauðteningur gyllist á 30 sek. Steikið nokkrar bollur í einu, í 2-3 mín.
Ég er svo hrædd við olíu, svo ég læt þetta í ofn, í svona 45-60 mín.

Skreytið gjarnan með kóríanderlaufum, sítrónubátum, tómötum og gúrkum /algengt í miðausturlöndum, gleymdi að segja að ég borðaði falafel í alltof mörg mál í Palestínu:)

Æðisleg frönsk Súkkulaðikaka

200 gr smjör
200gr suðusúkkulaði eða dökkt súkkulaði
4 egg
3 dl sykur
1 dl hveiti
100 fínt malaðir heslihnetukjarnar

Gera:
Smjör og súkkulaði í skál, brætt yfir vatnsbaði, þeyta egg og sykur mjög vel saman, smjörsúkkblanda látin út í egg og sykur og hrært varlega saman, hveiti og hnetum blandað saman og svo bætt varlega útí, blandið öllu varlega saman. Smyrjið og sáldrið hveiti (ég sleppti hveitidæminu) í 23 cm hátt form, bakið við 180 gráðu hita í umþ 35 mín. Skreytið með td. flórsykri, jarðaberjum og kíwi.

"Móðir, og hvað svo?"

2007-04-19T15:20:00.000-07:00

Er að vinna í blogginu, nokkrar uppskriftir sem bíða þess að koma inn. Þarf að bíða eftir að Eldar sendi mér myndir í gegnum sína tölvu á eftir, æ löng saga og fer ekkert lengra út í hana.

En það er annað sem er að brjótast um í heilanum á mér núna og matur kemst ekki að...enda átti þetta blogg svo sem líka að vera um aðra hluti.

Sko, í vikunni byrjaði ég að lesa bók sem heitir Draumaland sem fjallar um svefnvenjur barna 0-2ára, Saga byrjaði í ungbarnasundi, við fórum í kennslu um hreyfiþroska uppi í Kennó hjá sundkennaranum þar sem hún sem voru börn 7 vikna -14 mánaða og hún tók þau sem dæmi með því að sýna hreyfiþroska og þær hröðu breytingar sem verða hjá þeim, ég hitti mæður með börnin sín sem ég var með í foreldrafræðslu en við ákváðum að halda hópinn svona til gamans. Það hefur sem sagt mikið gerst, mörg ráð verið gefin og maður hefur heyrt hvernig aðrir foreldrar eru að hátta sínu uppeldi.

Allt í einu er Saga orðin 4. mánaða og samkvæmt ofangreindri bók er hún núna nógu gömul til að geta "ráðskast" með foreldra sína. Þe hún ætti að hafa meira vit á að td. ef hún grætur nógu mikið hjá pabba sínum, þá gæti verið að mamma taki hana. Og jú, þetta höfum við foreldrarnir orðið vör við. Og ungamamman er allt í einu orðin dálítil gribba og vill helst bara gera allt, klæða barnið í og úr, svæfa, láta í bílstólinn osfrv. Þá er minni grátur sem kemur. . Því það er einfaldara??
Þetta er auðvitað ekki nógu gott og mamman veit það. Svo virðist sem margir í kringum mann láti bara krílin upp í rúmið sitt (við enn að nota vögguna en það stendur til breytinga), bjóða góða nótt og börnin fara að sofa, eiga að venjast að sofna sjálf, einnig samkvæmt bókinni góðu, því þau hafa þann eiginleika að geta sofnað sjálf, og ég trúi því alveg.

Og Saga gerir það reyndar stundum, þegar hið hárrétta augnablik gefst, þegar hún er södd, með nýja bleiju og er sátt. Þá getur maður lagt hana og hún sofnar. En oft er hún kannski pínu þreytt, og þá leggst ég hjá henni, og hún sofnar eins og skot og svo er hún lögð í vögguna. Hún hefur alltaf sofið mjög vel, fer varla út úr herberginu milli 22-10. En er ég of mjúk? Veit ég verð að leyfa viljuga manninum mínum og pabba hennar að gera meira, okkur þremur til góða.
En þetta með svefninn finnst mér pínu ruglandi.

Ég var bara að fatta, svona fyrir alvöru að ég er mamma og ferðin er bara að byrja! Það er allt annað að sjá um hvítvoðung, það er svona basic needs sem gilda þar. Nú þarf ég virkilega að fara að meta hvað er best fyrir hana í lengdina. Ég vil samt líka fylgja mínu innsæi. Úff, mér finnst þetta rosalegt. Saga er mjög sælt og glatt barn, verið fljót til með allt og ekkert að hafa áhyggjur af. Það er augljóst að hún er engin hvítvoðungur ennþá en hún er samt lítil, og mér finnst hörmung að hlusta á hana gráta mikið, þannig er það nú bara. Það er rosalegt hvernig hún getur grátið og svo tekur maður hana og barnið steinþagnar. En vá, hún er 4 mánaða, hún er klár en hún er líka kríli sem þarf ást og umhyggju, úff, þunn línan þar á milli.

Hvert er mitt næsta skref sem móðir? Allt hefur gengið svo vel en nú hef ég fengið minn fyrsta alvöru efa, um hvað sé best og hvernig eigi að fara að því.

Hér var fluttur fyrsti þáttur í röðinni, "Móðir, og hvað svo?"

Frábært!

2007-04-18T06:08:00.000-07:00

Svona framtak er alveg frábært! Að sýna börnunum okkar að margt sniðugt sé hægt að gera til að hjálpa öðrum og að það þurfi ekki alltaf að kosta eitthvað, þó að það kosti reyndar smá vinnu en hún er örugglega unnin með ánægju.

Gómsætar uppskriftir og skemmtilegar myndir ættu að koma inn í dag eða morgun, búið að vera mikið að gera svo tímar þess á milli hafa verið nýttir í leti:)

Úr fréttinni:
Börn á miðstigi í Snælandsskóla í Kópavogi hafa undanfarin ár gripið í prjónana og prjónað teppi sem í dag voru afhent Rauðakrossi Íslands sem sendir teppin til Afríku. Börnin voru áhugasöm um að gerast með þessum hætti sjálfboðaliðar í hjálparstarfinu.

Innbakaður Páskahleifur með púrtvínssósu

2007-04-11T17:32:00.000-07:00

Vaknaði snemma á páskadag til að búa til "páskahleifinn" Í "matarbibilínunni" okkar (1000 Vegetarian recipes) heitir þessi hátíðlegi réttur, "Chick pea Roast" Ég prófaði þetta síðastliðið gamlárskvöld og þetta sló alveg í gegn. Er orðin dálítið þreytt á hnetusteik.

Við fórum svo með hleifinn til tengdó þar sem við borðuðum með þeim, en tengdamamma mín er frábær kokkur. Fengum mozarella ost og salat í forrétt, þau gæddu sér á fínum lambahrygg og svo fengum við æðislegan berja/súkkulaði/rjóma rétt í eftirrétt. Þær myndir eru teknar á litlu vélina og urðu bara ekki fínar, hún er ekki alveg að gera sig svo Eldar segir að hér eftir verði ég bara að taka stærri vélina með! Þetta er smá vinna en alveg þess virði, ótrúlega gott og fallegt.

Innbakaður Páskahleifur með púrtvínssósu
fyrir 6

450gr kjúklingabaunir (ca 2 dósir, án vökvans)
1 tsk þurrger
150 gr saxaðir valhnetukjarnar
150 gr brauðrasp (ég nota bara úr pakka)
1 laukur, smátt skorinn
100 gr sveppir
50 gr gular baunir
2 - 3 msk púrtvín eða sherrí (ég nota púrt)
2 msk grænmetissoð (ég hef reyndar notað um 4msk, annars svo þurrt)
1 msk ferskur koríander
salt og pipar
225 smjördeig, í Nóatúni hef ég fengið það í heilu lagi
1 egg
2 msk mjólk

Sósa

2 msk matarolía, td. rapsolía
1 púrra, þunnt sneidd
8 msk púrt (má nota sherri)
3 dl grænmetissoð

Gera: Blandið saman í matvinnsluvél, baunum, geri, valhnetum og brauðraspi, í 30-60 sek. Brúnið lauk og sveppi á stórri pönnu eða í potti, í 3-4 mín. Bætið út í baunablöndunni á pönnuna og svo einnig maís og hvítlauk. Bætið út í víni, soði og kóríander, blandið öllu saman. Takið af hellu og látið kólna. Breiðið út smjördeigið, myndið hleif úr blöndunni og þjappið henni vel saman, leggið hana inni í smjördegið og lokið undir, bleytið gjarnan þar sem þið lokið smjördeginu. Skerið krossmynstur ofan á hleifinn í deigið. Blandið eggi og mjólk, penslið hleifinn og skellið inn í 200 gráðu heitan ofn og bakið í um 30-40 mín eða þar til deigið hefur tekið á sig fallegan lit. Til að gera sósuna, hitið olíuna í potti, brúnið púrru í um 5 mín. Bætið í víni g soði, fáið upp suðu og látið svo "simmer"(hvað er orðið) í 5 mínútur. ég lét gulrætur með olíu, salti,, pipar, sesam og furuhnetum á hliðarnar en því má sleppa. Borðið með hrísgrjónum eða kartöflum. Njótið!!!

Föstudagurinn Langi

2007-04-11T03:40:00.000-07:00

Hélt áfram að þrífa í dag, í dag voru það neðri eldhússkáparnir, uss, þeir voru ógeð.
Ætlaði að elda lime risottóið vinsæla fyrir Karlottu systir og Kidda kærasta hennar. Við skulum segja að við systur erum ekki beint með sama matsmekk, hún og pabbi eru mikið fyrir kjötið og grænmeti er eitthvað auka. En svo átti ég ekkert risotto og þá voru góð ráð dýr. Ég var líka orðin þreytt og pirruð eftir þrifin í eldhúsinu og átti erfitt með að ákveða hvað átti að elda.

Ákvað að gera polentu með strengjabaunum í forrétt, og nota sætu kartöflurnar sem áttu að fara í ofninn í pottrétt. Þetta var tilraunastarfsemi sem bar góða raun og systa vildi uppskriftina, það er sko hrós.

Ég er búin að prófa mig áfram með polentu og ég mæli með að þú/þið prófið þetta, slær alltaf í gegn, mun auðveldara en maður heldur, ótrúlega gott og pínu öðruvísi. Líka gott með ferskum aspas, asísku wok, eða bara eitt og sér....það munu örugglega koma fleiri uppskriftir með þessum smáu gulu grjónum

Polenta með strengjabaunum fyrir 4

1 l grænmetissoð (2 teningar og vatn)
4 dl polentugrjón
1 dl paramesan
salt og pipar
1 laukur, smátt skorin
100-200gr strengjabaunir, ofan á

Mýkið laukinn í 2-3 mín, hellið svo polentagrjónunum yfir og þar á eftir soðinu,hrærið og fáið upp suðu. Látið sjóða í ca 2 mín og takið svo af hellunni. Látið blönduna yfir í smurt form með góðum köntum og þrýstið þannig að hún verði þétt, þykktin ætti að vera uþb 2-4 cm, þarf ekki að vera svo nákvæmt og maður prófar sig áfram.
Látið blönduna standa í 10 mín á borði, jafnvel við glugga og svo inn í ísskáp í minnst 30 mín en má vera mun lengur.

Takið út og myndið jafna ferninga 10cm x 10cm(ég gerði hálfa uppskrift í þetta skiptið þar sem þetta var forréttur en annars geri ég heila)
Skellið ferningana á pönnu, ég nota grillpönnu með örlitlu non-stick sprayi eða notið örlitla olíu sem þið dreifið með td. smá eldhúsrúllupappír (má líka grilla á grind í ofni)
Grillið eða steikið bitana í ca. 5-10 mín, fallegt að fá rendur á bitana.

Látið baunirnar í sjóðandi, saltað vatn í ca. 5 mín. Hellið af vatni, látið í skál, hellið yfir skvettu af ólífuolíu, smá sítrónusafa, sjávarsalti og nýmöluðum pipar, namm!

Skellið polentubitanum á disk, raðið baununum ofan á, stráið smá paramesan yfir og gerið jafnvel rönd af balsamic edik í kringum (tókst reyndar ekkert of vel hjá mér, sjá mynd)

Verði ykkur að góðu!!

"Sætar kartöflur" pottréttur fyrir 4

1 laukur
2 hvítlauksrif
3 sætar kartöflur
1 dós hakkaðir tómatar
1/2 dós eða lítil dós af kókosmjólk
1 grænmetisteningur, leystur upp í örlitlu af sjóðandi vatni
Ferskur kóríander til að strá yfir (má sleppa)

Kryddin eru svona ca hjá mér þar sem ég mældi ekkert:

1 msk paprikuduft
1 - 2 tsk cumin
1/2 tsk kanill
1/2 tsk carry
1/2 tsk cayenne pipar
1/2 tsk chilipipar
salt og pipar

Berið fram með hrísgrjónum og salati. Gott er að hafa hreina jógúrt með smá hvítlauk, salti, pipar, sítrónusafa og steinselju)

Spaghetti í flýti

2007-04-11T03:26:00.000-07:00

Í fyrrdag, skírdag vorum við hjónin hér á fullu við tiltekt. Enda var það löngu orðið tímabært. Við vorum lengi að og svo kom tengdapabbi í heimsókn en við höfðum boðið honum í mat þar sem hann var einn í koti og svo á hann líka svo fína borvél:) Við á Skúló erum ekkert svakalega laghent í svoleiðis málum. Við vorum svo sein, orðin þreytt og pirruð og spurning um að gera eitthvað fljótlegt, þetta varð afraksturinn:

Spaghetti "a la flýti"

100-150 gr spaghetti á mann
1 rauðlaukur, smátt skornir
1 hvítlauksrif
1-2 tómatar, smátt skornir
grænar ólífur
1 krukka grænt pestó
1/2 dós 5% sýrður rjómi (má vera meiri % að sjálfsögðu og má líka bara sleppa)
slatti af paramesan ost til að strá yfir, gott að hafa hvítlauksbrauð með

Mýkið rauðlauk og hvítlauk, bætið út í tómötum og olífum, svo skellið þið pestóinu yfir
og svo bæta út í sýrða rjómanum. Stráið ostinum yfir og borðið, tilbúið á ca 10 mín.

Ég er moldrík!

2007-04-10T06:21:00.000-07:00

Ég er svo rík! Ég á besta eiginmann í heimi, yndislega, heilbrigða dóttir, frábæra fjölskyldu og tengdafjölskyldu og svo á ég bestu vini í heimi. Er í einhverju væmniskasti í dag og finnst bara langt síðan að ég hef verið svona hamingjusöm og ánægð með lífið. Bara varð að tjá mig aðeins um þetta.
Seinna í dag bæti ég svo inn nokkrum færslum sem hafa safnast upp, þarf bara að skella inn myndum og svo kemur þetta.

Eigið góðan dag!!!

Matarboð í Mosó

2007-04-04T17:37:00.000-07:00

Vorum í kvöld boðin til Kristínar og Hóffí í dinner. Maður fer aldrei svikin eða svangur út þaðan.
Alltaf svo gaman að heimsækja þær! Þær buðu upp á dýrindis tómat/grænmetissúpu, gómsætt salat og ostafyllt heimabakað brauð, ljúfengt! Svo ferskir ávextir með rjóma í eftirrétt. Eftirréttinum skolað niður með stjórnmála-, tónlistar-og barnaumræðu:) Takk fyrir okkur!

Búlgörsk linsusúpa

2007-04-04T04:01:00.000-07:00

Þessa uppskrift fann ég í uppskriftabók þegar ég var að vinna næturvakt á skammtímaheimili sem ég vann á í Svíþjóð fyrir fötluð börn , tók stundum að mér næturvaktir svona til að fá smá aukapening en ég var ekkert hrifin af því, varð alltaf hálf skrítin eftir nóttina.
Miklu skemmtilegra líka að vinna á daginn, þegar börnin voru vakandi.

Og aðeins meira um þetta, þetta var alveg frábær vinnustaður, í skógarjaðri, vatn í göngufjarlægð til að synda og leika í , allt í kring hægt að týna epli, hindber og kirsuber, alltaf einn starfsmaður á barn og menntuð eldhús/mötuneytis kona sem sá um matinn þannig að hann væri hollur og góður . Nóg um það, þegar ég flutti heim langaði mig gjarnan að vinna að hluta til við eitthvað svipað, svo ótrúlega gefandi starf. Little did I know..

2-3 starfsmenn á 5 einstaklinga, einstaklingarnir á aldrinum 12 til 50ára, með mjög misjafna fötlun, mjög ólíkur hópur með oft lítið sameiginlegt. Þurftum sjálf að elda matinn sem var ekki sá næringaríkasti, helst koma öllum í bað á kvöldin og ná að sinna öllum sem einstaklingum út frá þeirra þörfum, sem á auðvitað að vera markmiðið.
Sum kvöld gekk þetta ágætlega, eftir því hvaða einstaklingar voru hjá okkar en sumir hefðu algjörlega þurft einn starfsmann með sér þannig að sum kvöld þá var maður hreinlega lafmóður og ég meira að segja gleymdi manneskju inni á klósetti, tvisvar, á meðan ég var að reyna að sinna öðrum. Ég tók þetta allt svo nærri mér að ég hætti eftir rúma 2 mánuði.
Ég veit að við búum í fámennu landi og þá sjálfkrafa verða möguleikar vissra samfélagshópa minni, þekki það líka persónulega en ég á einhverfan bróður sem að hefur átt misjafna ferð í gegnum kerfið hérna. Úff, þetta gerir mig yfirleitt bara leiða svo að skemmtilegri hlutum...

Eldaði súpuna í gær og bakaði brauð og svo tókum þetta bara með okkur til hinna nýbökuðu foreldra, Laufeyjar og Bjarka, vitum sjálf að maður er ekkert á fullu í eldhúsinu fyrstu dagana og því gott að fá eitthvað gott í mallakút. Speltbrauðið sem uppskrift er að í annarri færslu var einstaklega gott, var með kúmen í því og graskersfræ ofan á, mjög gott og líka frábært, ristað daginn eftir með smjöri og ost.

Búlgörsk linsusúpa

2 gulir laukar, smátt hakkaðir
2 hvítlauksrif
1 msk olía
1 l vatn
2 grænmetisteningar
2 dl rauðar linsur
1 msk paprikuduft
1 tsk salt
1 lárviðarlauf
1 tsk timjan
1 dós hakkaðir tómatar
1/2 tsk sykur
1/2 tsk balsamic vinegar (má sleppa)
Klípa af sýrðum rjóma út í hverja skál og steinselja rifin yfir (má sleppa)

Gera:
Mýkið lauk og hvítlauk, skellið svo út í linsum og paprikudufti, síðan tómatana
yfir, þar eftir vatn og teningar, svo lárviðarlauf og krydd, látið malla í 30-40 mínútur. Hellið í balsamic edikinu í endann. Því lengur sem þetta fær að malla, því betra, þetta verður svona þykk súpa, sniðugt líka að bara fram hrísgrjón með.

Mæli með að gera tvöfalda og frysta!

Barinn og rændur í hjólastól

2007-04-03T04:19:00.000-07:00

Þetta er bara ömurlegt. Kannast aðeins við þennan unga mann, sem ráðist var á, í gegnum starf mitt með fötluðum. Hann er mjög duglegur að fara sinna ferða í stólnum og þið örugglega séð hann einhvern tíma á ferðinni.
Hann verður varla mikið á ferðinni eftir þetta, ömurlegt! Hámark siðblindu!

Og í gær eða fyrradag, ráðist á áttræðan mann við Miklubraut að mig minnir, hvað er að gerast!

Sunnudagsmatur

2007-04-02T17:46:00.000-07:00

Í gær langaði mig rosalega mikið í það sem lifir í minningunni sem týpískur sunnudagsmatur.
Þetta gerist ekki oft en útkoman varð þessi, brokkólí buff frá Móðir náttúra, brún sósa, grænar baunir, hrásalat í boxi og svo kartöflumús. Þetta væri ekki frásögufærandi nema hvað, húsfreyjan gerði alvöru kartöflumús í fyrsta skipti, mjög fullorðins. Tók enga mynd en þetta var góð tilbreyting og dálítið "old school" fyrir utan buffin.

Brjóstagjöf er góð.....

2007-04-02T07:34:00.001-07:00

en allt er gott í hófi. Kíkið á þetta hér .
Læt þetta einnig fylgja með þar sem þetta er tengt.

Rómó limesrisotto með sætum kartöflum

2007-04-02T04:07:00.000-07:00

Þessi réttur er vægast sagt einn sá vinsælasti á mínu heimili! Okkur þykir hann alveg rosalega góður og elskum reyndar flesta risotto rétti. Til marks um hversu mikið mér þykir risotto gott þá varð ég td bara hálf miður mín síðastliðið sumar þegar ég var á hinum ágæta veitingastað, Hornið, og fékk mér grænmetis risotto, og það var bara ekkert varið í það! Bara eins og venjuleg hrísgrjón í grænmetissulli. Ég á það einmitt til að verða hálf ósátt þegar ég lendi í svona og hver kannast ekki við að fá of mikið eða lítið soðið pasta á veitingastöðum, mér finnst það alveg glatað, því það er jú svo mikilvægt að hafa þetta just right eða al dente. Ég hljóma eins og hin versti nöldurseggur, haha, vind mér í efnið.

Já, ég elda nú oftast á þessu heimili og þá líka þennan rétt en Eldar ákvað að elda á laugardaginn(þarna voru einhverjir sem hugsuðu eldar að elda, haha) , mér finnst frábært þegar hann sér um þetta, eiginlega mjög rómó og hann stóð sig eins og meistarakokkur, ótrúlega gott, ég bara fæ ekki leið á þessum rétt, jæja, uppskriftin góða kemur hér og mynd sem ég tók.

Lime eða súraldin risotto með sætum kartöflum fyrir 2

2 stórar sætar kartöflur
olífuolía
2 dl avorioris (kaupi yfirleitt í Nóatúni eða Hagkaup)
5dl grænmetissoð (soðið vatn og 1 teningur, líka hægt að nota kjúklingakraft)
1 gulur laukur
1 hvítlauksrif
1 dl rifinn paramesan ostur
1-2 lime
smjör
salt og pipar

Gera:
Setjið ofninn á 200, skrælið og skerið kartöflur í teninga. Látið í smurt (smá olíu í botninn) eldfast mót, skvettið smá olíu yfir og inn í ca. 30 mín. Hrærið í, einu sinni eða tvisvar. Kryddið svo með salti og pipar og jafnvel með fersku eða þurrkuðu oregano (geri það sjaldan)

Skerið smátt, lauk og hvítlauk, mýkjið í smjörinu með rísinu án þess að það brúnist, hellið síðan yfir grænmetissoðinu, bara alltaf smá skvettu í einu. Þetta getur verið pínu vandmeðfarið og maður verður eiginlega að standa yfir þessu og láta sjóða og hæra reglulega í áður en næsta skvetta fer í. Gerið þetta í ca.18 mín. Áferðin á að verða mjúk, creamy og svona næstum seigt eða tyggjanlegt. (ekki það léttasta að þýða sum orð finnst mér)

Rífið limebörk, pressið ca 1 msk af limesafa út í risottoið. Bragðbætið með salti og pipar og jafnvel meiri safa. Hrærið að síðustu ostinum út í. Skreytið með limeberkinum og jafnvel meiri ost.

Mömmulunch

2007-03-30T15:03:00.000-07:00

Það var hálfgrátt í dag og rigningarlegur föstudagur. Svona dagar eru tilvaldir til að fá til sín góða gesti. Við ákváðum að hittast hérna á Skúló, ég og þrjár aðrar mömmur, Ylfa með hana Heklu sína, Edda með Ívar Óðinn og Kikka frænka með litlu skott(verður skírð á Sumardaginn fyrsta) Þessi kríli eru öll fædd á tímabilinu 17.des´06 - 29.jan´07
Skellti í eina grænmetissúpu og svo var bara brauð og álegg. Eplalengja í ofni í eftirrétt (mæli með henni, fæst í Bónus á 299kr, snilld. Bar fram vanillusósu með henni sem ég kaupi í Sverige og maður vispar hana bara með mjólk, namm.

Mömmusúpan

- 1 gulur laukur
- 1 blaðlaukur (púrra)
- 4 gulrætur
- 1 blómkálshöfuð (getið notað kartöflur í staðin)
- 2-3 hvítlauksrif
- dós kókosmjólk
- dós hakkaðir tómatar
- 2 dósir vatn
- 1 dl tómatpúrré
- 2 grænmetisteningar
-1-2 tsk cumin
- 1-2 tsk paprikuduft
- skvetta af cayenne pipar og tumeric, má sleppa
- smá salt og pipar
-Ferskur kóríander til skreytingar (ég gleymdi því í dag)

Gera:
Laukur og blaðlaukur, skorið smátt og látið mýkjast í olíu ásamt hvítlauk í ca 5 mín. Restin af grænmetinu skorið í smá bita og sett út í. Bætið út í tómötum og svo kókosmjólkinni, bætið svo út í vatni og teningum (ég sýð vatn í hraðsuðukatlinum, læt sitthvorn teningin í dósirnar utan af tóm. og k.mjólkinni, helli svo soðnu vatninu yfir teningana svo þeir leysist upp og helli útí) Kryddið og látið svo malla í 30-40 mín. Klippið kóríander yfir réttinn

Auka: ekki vitlaust að skella í eins og 1-2 dl af rauðum linsum útí, nýrnabaunum eða kjúklingabaunum, svona til að fá í sig góð prótein

Destiny matarboð hjá Söru Nöktu

2007-03-30T13:36:00.000-07:00

....bara nípa af salti

Vorum boðin í matarboð á miðvikudaginn. Fyrst skellti ég mér örstutt með Myrru sætu á Kaffibarinn til að hlusta á Volta, nýju plötu Bjarkar og fannst mér hún hljóma mjög vel, svona við fyrstu hlustun. Svo var haldið í Destiny matarboð heima hjá Söru en þar var hún sem sagt búin að bjóða nokkrum velvöldum gestum sem eiga það sameiginlegt að vinna á einhvern hátt fyrir Mr. Destiny eða Hr. Örlyg. Sara rekur einmitt Nakta Apann sem hefur gert frábæra boli og peysur fyrir Airwaves síðustu 2 ár. Einnig hefur hún verið ötul í að prenta boli og peysur fyrir FÍP, sem hafa selst eins og heitar lummur og peningurinn sendur beint í þarfa hluti í Palestínu.

En já, maturinn, hann var algjört sælgæti! Á borðstólnum var ma. einhvers konar spínatblanda vafin í smjördeig, kúrbítssúpa sem var æði, gulrætur og sætar kartöflur í ofni og ofan á það var látin einhver fræ blanda sem var alveg ótrúleg. Og fyrir ykkur hin sem borðið fisk og kjöt, þá var einnig boðið upp á skötusel, innvafinn í parmaskinku og svo humarhalar. Og þessu öllu skolað niður með kældu hvítvíni, ummm!!

Mér finnst reyndar sjávarréttir oft mjög girnilegir, eins og limelaxinn hjá Elínu í Köben, en einhvern langar mér samt ekki í.

Takk fyrir frábært matarboð Sara! Spurning um annað matarboð á Skúlagötunni fljótlega?

P.s. Saga var auðvitað hress að vanda, henni finnst gaman á mannamótum

Kjúklingabaunaréttur og Desperate Housewifes

2007-03-30T11:57:00.000-07:00

Eftir að hafa reynt lengi lengi að hittast, þá varð loks að því, Inga Birna og Anna Linda komu í heimsókn. Var stefnt á að borða saman og horfa á DH. Svo var reyndar stjórnarfundur hjá Ísland-Palestína en ég sit í þeirri stjórn. Þá voru góð ráð dýr, átti að hætta við, ónei, ekki einu sinni enn! Svo mamman á Skúló eldaði áður en farið var á fundinn svo allt yrði reddí, fannst það eitthvað svo fullorðins, hehe. En já, náði fundinum sem by the way var mjög skemmtilegur því nú er komin ný og fjölmennari stjórn sem ég hlakka mikið til að starfa með. En já, stelpurnar mættu og við áttum saman góða kvöldstund. Rétturinn sem boðið var uppá er mjög einfaldur og ódýr, var vinsæll á námsárunum góðu.

Kjúklingabauna- og spínat réttur 4 skammtar
(ég geri reyndar yfirleitt tvöfalda, í mörgum sænskum uppskriftum er sagt hversu margir skammtar, sumir myndu túlka það sem fyrir fjóra en ég hef rekið mig á að oft verður það of lítið á mann og enginn vill jú að fólk fái ekki nóg)

-1 gulur laukur, smátt skorinn
-1 hvítlauksrif
-jurtaolía til steikingar
-2 tómatar, skornir í bita
-200 g spínat, ég nota oftast fryst og læta bara einhvern slatta, líklegast um 200 g en ef einhver veit hver hlutföllin eru þá endilega látið mig vita.
-2 tsk tumeric (svona gult krydd sem gefur fína gula litinn)
-2 dl kókosmjólk
-4 dl kjúklingabaunir (ég nota alltaf úr dós)
-salt og pipar

(svo svona auka, ég bæti oft við td smá skvettu af öðrum kryddum, td. cumin, kanel, karrý og chayenne pipar) Svo er smart að nota í eina rauða papriku, gerir þetta fallegt.

Gera:
Mýkið lauk og hvítlauk í olíunni í nokkrar mínútur, bætið út í spínati og mýkið svo að það þiðni, bætið svo við tómötum og síðast paprikunni ef hún er notuð. Bætið við tumericinu og hrærið í. Bætið út í kjúklingabaununum og kókosmjólkinni og látið malla í 10 mín. Bragðbætið
með salt og pipar (og hinum kryddunum).
Ber þetta yfirleitt fram með hrísgrjónum og salati.
Hafði einnig nýbakað speltbrauð með, uppskrift úr grænu Hagkaupabókinni, læt hana fylgja með hérna fyrir þá sem eiga hana ekki.

Speltbrauð
-5 dl speltmjöl
-3 tsk vínsteinslyftiduft
-1/2 - 1 tsk sjávarsalt
-2dl ab mjólk
-2dl sjóðandi vatn

-Bragðbætið brauðið að vild með td. sólblóma-,graskers,- eða sesamfræjum, kókosmjöli, kúmen, hunangi, kanel og rúsínum, ólífum eða sólþurrkuðum tómötum, já, barasta það sem er til í skápnum

Gera:
Blandið saman þurrefnum, bætið svo út í vökvanum (ég læt ab í könnu og helli svo heitu vatninu yfir svo þetta blandist) Hrærið varlega saman, alls ekki mikið því það er galdurinn við þetta frábæra og auðvelda brauð. Látið í smurt form og bakið á 200 gráðum (finn ekki merkið) í 25-30 mín. (ég er með eldgamlan ofn og þarf yfirleitt að hafa þetta í 40 mín)

Sítrónu- og basilíku pasta

2007-03-30T11:18:00.000-07:00

Við á Skúlagötunni erum mikið pastafólk. Við erum sammála um að hið einfalda er oft lang best. Og ferskar kryddjurtir gera hvaða mat sem er að kóngamat. Og já, paramesan ostur, það er bara ekki hægt að borða pasta án þess að hafa með paramesan....Þar sem við borðum hvorki kjöt né fiskafurðir(bara þoli ekki orðið grænmetisæta), þá splæsum við alltaf í kryddjurtir og ostinn, en þetta finnst okkur algjör lúxus, það var bara einstaka sinnum að maður leyfði sér slíkt á námsárunum í Gautaborg.

Hérna kemur uppskriftin:

Sítrónu- og basilíku pasta
fyrir 2

-safi úr 2-3 sítrónum
-1 dl ólífuolía
-100-125 g rifinn parmesanostur
-smá hunang
-1 knippi basilika
-250-300 g soðið pasta (ég nota yfirleitt spaghetti, veit ekkert hvað mikið)

Gera:
Sjóðið pastað, látið renna vel af því og látið aftur í pottinn.
Á meðan pastað sýður, vispið þá sítrónusafann kröftugt með olíunni og hrærið svo út í ostinum þar til sósan er orðin pínu þykk og "creamy" Bragðbætið með smá hunangi og jafnvel meiri sítrónusafa ef þér finnst það betra.

Hellið sósunni yfir pastað og hristið pottinn þannig að pastað sé þakið sósunni. Blandið að síðustu rifinni basilikunni yfir. Gott að bæta smá svörtum pipar og jafnvel smá sjávarsalti yfir.
Skreytið gjarnan með basilikublaði og smá sítrónu berki.

(á myndinni sem fylgir þá átti ég bara einhverja risa basiliku þannig að ég varð bara að klippa hana yfir réttinn ef hefði nú þótt fallegara að vera með heil, falleg blöð)

Verði þér/ykkur að góðu

jæja, þá er maður orðin bloggari!

2007-03-21T18:58:00.000-07:00

Yndið mitt hún Saga

Eftir mikla umhugsun þar sem ég hef hugsað, já, ef ég væri bloggari, þá myndi ég tjá mig um þetta eða hitt, hef ég ákveðið að hella mér í þetta. Fínt að geta dundað mér við þetta þar sem ég er mikið heima núna. Er í fæðingarorlofi en ég á yndislega dóttir sem heitir Saga.

Þetta blogg mun að mestu tengjast mat og uppskriftum því ég hef mikinn áhuga að skoða uppskriftir, leita að uppskriftum, breyta þeim og svo laga mat eftir þeim. Það sem hefur haldið aftur að mér er hræðslan við stafsetningar- og orðarugl. Þessi fjögur ár okkar í Svíþjóð virðast hafa skilið eftir sig dýpri spor en ég hefði trúað. Eins og ég hafði fyrir því að mynda rétta orðaröð á sænsku, þá virðist þurfa að afrugla mig aftur í þeim málum. Eins og, ef ég ætla að senda afmæliskveðju, þá hef ég tilhneigingu til að vilja segja, Til hamingju með afmælið, óska Eva, Eldar og Saga. (Grattis på födelsedagen, önska Eva, Eldar og Saga). En þetta eru nú engar rosa vitleysur hjá mér, held ég.

En já, nú hef ég ákveðið að þörfin fyrir að tjá mig er sterkari en áhyggjurnar yfir að ég skrifi vitlaust. So here I go. Þetta verða sem sagt að mestu uppskriftir en þegar þörfin um að tjá sig um eitthvað annað gerir vart við sig, þá fær það að fljóta með. Og svo hvet ég auðvitað fólk til að tjá sig, senda eða benda á sniðugar uppskriftir og koma með athugasemdir. Og kannski til ykkar sem þekkið mig ekki, þá borða ég ekki kjöt og fiskafurðir (þoli ekki að kalla mig grænmetisætu) þannig að það verður lítið um slíka rétti hér.