Innbakaður grænmetishleifur með púrtvínssósu

Fann loks fína mynd af innbakaða hleifnum góða sem ég geri yfirleitt á Gamlárskvöld og um páska. Geri hleifinn líka stundum fyrir góða gesti, kannski dálítið til að sýna fram á að það er líka hægt að gera sparílegan mat með klassísku meðlæti eins og fólk td. fær sér með læri, hrygg og svo um jól. Hef prófað hnetusósu og sveppasósu með en þessi sósa er líka skemmtileg viðbót. Hvernig væri að prófa svona "steik" um helgina.

Innbakaður grænmetishleifur með púrtvínssósu

• 450gr kjúklingabaunir (ca 2 dósir, án vökvans)
• 1 tsk þurrger
• 150 gr saxaðir valhnetukjarnar
• 150 gr brauðrasp (ég nota bara úr pakka)
• 1 laukur, smátt skorinn
• 100 gr sveppir
• 50 gr gular baunir
• 2 - 3 msk púrtvín eða sherrí (ég nota púrt)
• 2 msk grænmetissoð (ég hef reyndar notað um 4msk, annars svo þurrt)
• 1 msk ferskur koríander
• salt og pipar
• 225 smjördeig, í Nóatúni/Hagkaup hef ég fengið það í heilu lagi
• 1 egg
• 2 msk mjólk

Sósa

• 2 msk matarolía, td. rapsolía
• 1 púrra, þunnt sneidd
• 8 msk púrt (má nota sherri)
• 3 dl grænmetissoð
• 
  

Blandið saman í matvinnsluvél, baunum, geri, valhnetum og brauðraspi, í 30-60 sek. Brúnið lauk og sveppi á stórri pönnu eða í potti, í 3-4 mín. Bætið út í baunablöndunni á pönnuna og svo einnig maís og hvítlauk. Bætið út í víni, soði og kóríander, blandið öllu saman. Takið af hellu og látið kólna. Breiðið út smjördeigið, myndið hleif úr blöndunni og þjappið henni vel saman, leggið hana inni í smjördegið og lokið undir, bleytið gjarnan þar sem þið lokið smjördeginu. Stingið göt í deigið. Blandið eggi og mjólk, penslið hleifinn og skellið inn í 200 gráðu heitan ofn og bakið í um 30-40 mín eða þar til deigið hefur tekið á sig fallegan lit. Til að gera sósuna, hitið olíuna í potti, brúnið púrru í um 5 mín. Bætið í víni g soði, fáið upp suðu og látið svo "simmer"(hvað er orðið) í 5 mínútur.
Berið fram með dásamlegu meðlæti og njótið!

Polenta á fennikubeði.

Polenta er ósjaldan á mínum borðum. Ég átti fenniku (fennel) í ískápnum en fyrir jól steikti ég fenniku í smjöri, sírópi, salti og pipar og hafði ofan á beðinu grillaðan halloumi og fannst mér það smakkast vel saman. Í þetta skiptið átti ég ekki ostinn góða og ákvað því að útbúa polentu "medalíur". Eins eru rauðrófur mikið notaðar á heimilinu og tilvalið að rífa niður ferska rófu með. Þetta var sem aðalréttur hjá okkur en uppskriftin ætti að duga sem forréttur fyrir 4 en þá mætti kannski bæta annari rauðrófu við en ég notaði reyndar litla. Gerði þetta síðustu helgi og vona að ég muni þetta rétt

Polenta á fennikubeði

• 7 dl vatn
• 2 dl polentugrjón
• 1 grænmetisteningur
• 1-2 dl rifinn ostur, má sleppa
• 1 dl paramesan, helst ekki sleppa
• Rifinn börkur af hálfri sítrónu
• 2 fennikur
• Síróp
• 1 rauðrófa
• 1 fersk fíkja, má sleppa
  
• Smjör til steikingar
• Balsamikedik
• Salt og pipar

Setjið vatn og tening í pott, fáið upp suðu, takið pottinn aðeins af hellunni og hellið polentu út í og hrærið hratt með písk, passa að ekki myndist kögglar, látið aftur á helluna sem ætti að vera á miðlungshita og hrærið endalaust, það skvettist stundum upp úr pottinum svo ég tek pottinn oft aðeins af og læt á. Þegar þetta er orðið að mjúkri hræru, skellið þá ostinum út í og hrærið niður. Látið svo hræruna í olíusmurt form, ég notaði form sem er ca. 20cm x 15 en getið líka notað bökuform og bara að reyna að hafa þykktina ca. 1 1/2 - 2 cm. Látið formið inn í ískáp.

Skerið af efri og neðri hluta fennikunnar, stundum þarf að henda ysta lagi,skerið í strimla, skolið og þurrkið. Steikið í smjöri, þegar þetta verður pínu glært, skellið þá 1-2 msk af sírópi, getið notað agave en ég notað hlynssíróp (maple). Ég saltaði og pipraði aðeins.

Afhýðið rauðrófuna, ekki vitlaust að nota lítinn plastpoka eða eitthvað til að halda við svo rauði liturinn festist ekki á fingrunum. Notið rifjárn og rífið, helst ekki of fínt. Geymið í skál og mig minnir að ég hafi skvett smá sítrónu yfir.

Takið polentu út úr ískáp. Ég á svona "sívalinga" sem ég keypti í Kokku sem ég nota stundum við matargerð. Notaði þann minni sem er ca. eins og bolli að þvermáli. Notaði eins og form og skar út nokkar "medalíur". Held að það sé alveg hægt að nota bolla til að skera út en annars bara skera í ferninga, ekkert verra. Steikti svo litlu polentubitana upp úr lítilli olíu. Lét sívalinginn á diskana og lét steiktu fennikuna ofan í, svona til að það myndi mynda hringlaga beð (alveg hægt að gera bara fríhendis og gera með höndum). Lét svo polentubita ofan á beðin, lét svo sívaling aftur ofan á polentu, fenniku ofan í og svo aftur polentubita yfir. Látið 1-2 tsk af balsamic yfir rauðrófuna og hrærið í. Ég lét svo sívalinginn við hliðina á "turninum" og hellti rauðrófunni ofan í. Átti ferska fíkju og lét þannig bát efst. Drukkum spánskt rauðvín með og allir mjög sáttir eða já, við bæði, hjónin.

Möndlu- og chili spaghettí

Eins og ég hef nefnt í eldri færslu, þá eru mánudagar oftast pastadagar og þriðjudagar súpudagar á heimilinu. Ég er frekar heilalaus eftir vinnu þá daga og þá gott að vera búin að þrengja valið aðeins. Ég gef sjaldan upp fyrir hversu marga uppskriftirnar eru en ætla að reyna að hafa það í huga. Oftast er ég þó að elda fyrir okkar þriggja manna fjölskyldu og þá með það í huga að maður geti fengið sér ábót, enda er það alveg nauðsynlegt fyrir matargat eins og mig.

Möndlu- og chili spaghettí varð niðurstaðan einn mánudag í janúar og verður gert aftur. Ég elska chili og ég elska möndlur svo það kom ekki á óvart. Heimasætan er aftur á móti á tómatsósu tímabilinu og vonandi eldist það bara af henni. Ég nota Sambal Olek , chilimauk sem ég kaupi venjulega í asísku búðinni við Hlemm og nota í súpur og ýmislegt annað. En það má alveg nota ferskan chili, kannski hálfan til heilan um leið og hvítlaukurinn er steiktur. Held að þetta hafi verið nokkurn veginn svona. Ath. Þetta er gömul færsla frá mér af Miðjunni. Heimasætan er ennþá á tómatsósutímabilinu og við hefur bæst brosmoli sem deilir hennar dálæti.

Möndlu- og chili spaghettí

Ca. 300 gr spaghetti (ég notaði heilhveiti)

3-4 tómatar

1 hvítlauksrif

1 1/2 msk ólífuolía

2 dl fersk basilika (ca. 2-3 tsk þurrkuð giska ég á?)

1/2 til heil tsk sambal olek (smakkið ykkur áfram)

1/2 tsk salt

1 dl möndlur (ég notaði flögur)

Sjóðið pastað samkvæmt leiðbeiningum. Hitið olíu og steikið tómatana og hvítlaukinn, leyfið aðeins að malla þangað til vökvinn byrjar að aukast frá tómötunum, bætið þá sambal olek út í og rífið basilikuna útí(geymið smá til „skreytingar), saltið, hrærið í og lækkið hitann. Á sama tíma, ristið möndlur á pönnu þangað til að þær taka smá lit á sig. Hellið af pastanu, látið standa í 1 mín. Hellið ólífuolíu yfir spaghettíð og hrærið lauslega í gegnum. Setjið á diska, látið tómatchiliblöndu með möndlunum yfir og að lokum stráið smá ferskri basiliku yfir ef notuð. Maðurinn minn notaði paramesan yfir en ég vildi sleppa því í þetta skiptið. Ég mæli jafnvel með að gera tvöfalda uppskrift af gumsinu því það er svo gott en ég nenni ekki að breyta uppskriftinni.

Steikt eggjabrauð með rjómaosti, bláberjum, sírópi og ristuðum möndluflögum

Leyfið mér að kynna hin fullkomna sunnudagsmorgunmat! Þessa uppskrift rakst ég á í útlensku óléttublaði. Er með nokkur blöð í láni en einhvern veginn hef ég bara rétt nennt að glugga í þau, eitthvað annað en á fyrstu meðgöngu þegar maður bókstaflega drakk í sig allan fróðleik sem maður komst yfir. En já, rakst á þessa girnilegu uppskrift og var ekki róleg fyrir en búið var að prófa þetta. Þetta er auðvitað alveg dísætt en engu að síður yndislegt á fallegum sunnudagsmorgni. (Ath.þessi færsla er gömul, þessi uppskrift birtist fyrir rúmu 1 1/2 ári á Miðjunni)

Steikt eggjabrauð með rjómaosti, bláberjum, sírópi og ristuðum möndluflögum

• 1 lítill bláberjabakki (held að hann sé 100g)
• Hreinn rjómaostur
• 2 egg
• 2 eggjahvítur
• 2 msk hunang
• 4 sneiðar heilhveitibrauð
• 30 g smjör, helst ósaltað í grænu pökkunum
  
• Hlynssíróp
• 2 msk möndluflögur

Pískið saman egg, eggjahvítur, mjólk og hunang. Hitið smjörið á pönnu, við notuðum grillpönnu. Dýfið brauði í blöndu og steikið þangað til að þetta fær á sig lit. Á sama tíma, ristið möndluflögur þangað til að þær taka á sig smá lit. Smyrjið svo 2 brauðsneiðar ríkulega með smurostinum, látið fullt af bláberjum á milli og smellið saman. Skerið í tvennt, hellið svo sírópi yfir og stráið að lokum möndluflögum yfir. Lokið augunum og njótið þess að bíta í, og njótið þess að vera til!

Yndislegt lasagne

Það verður að viðurkennast að þessi húsmóðir hefur verið lítið skapandi í eldhúsinu undanfarið. Kannski er það lítið að fara að breytast en hver veit. Til að koma mér í gang þá ætla ég að byrja á því að birta nokkrar uppskritir sem ég gaf upp á Miðjunni sálugu sem ég sakna. Ætla mér að elda eitthvað nýtt og gott í kvöld enda laugardagskvöld, ekkert á dagskrá, bara að njóta sín og vera til og þá er gaman að elda mat.

Þessa uppskrift fann ég einhvern tíma á netinu og þetta er besta lasagne sem ég hef búið til og gott að búa til tvöfalda uppskrift og frysta. Einföld uppskrift er reyndar ágætlega stór en hver vill ekki taka með sér afganga í vinnuna? Þetta tekur smá tíma í fyrsta skipti en alveg þess virði!

Yndislegt lasagne

Rauð sósa:

* 2-3 gulir laukar

* 3-4 gulrætur

* 2-3 hvítlauksrif

* 2 dl rauðar linsur

* 2-3 dl vatn

* 2 dósir hakkaðir tómatar

* 5-6 msk tómat pure

* 1 grænmetistengingur

* Ólífuolía

* Salt, svartur pipar, sykur, basilika, oregano,paprikuduft, chilli,cayenne pipar

Laukurinn skorinn smátt. Gulrætur rifnar gróft. Hvítlaukurinn pressaður og látið þetta þrennt mýkjast í olíunni á pönnu. Linsunum bætt við ásamt vatni, tening, tómötunum og tómatpure.

Hvít sósa:

* 300-400 g kotasæla

* 3 dl rifinn ostur (geyma hluta til að láta ofan á)

* 200 g frosið spínat

* Salt, hvítur pipar, múskat (alveg hægt að nota svartan pipar)

Spínat látið þiðna(hef hellt sjóðandi vatni yfir/hitað í örbylgju) og kreista svo vatnið vel af (ég nota kartöflupressu). Öllu blandað vel saman og kryddað.

Lasagne plötum er raðað á botninn í eldfast form. Því næst er sett rauð sósa, plötur, hvít sósa og plötur. Þetta er endurtekið þar til formið er fullt. Endað er á plötum, ofan á þær er stráð rifnum osti og að lokum er 1-2 dl af mjólk hellt yfir allt saman. Bakað í ofni, 200° í ca.40 mínútur.

Þistilhjörtu- sítrónu og möndlurisotto

Þessi mynd fær að duga þar til ég nenni að hlaða inn af stóru vélinni.

Keypti RISAstóra krukku af þistilhjörtum um daginn. Fékk síðan algjört "craving" í dag og ákvað að gera risotto með þistilhjörtum ( ég veit, risotto, rauðrófur, polenta, möndlur...mikið uppáhald hjá undirritaðri og ósjaldan í mínum uppskriftum). Útkoman varð bara ágætis sunnudagsmáltíð. Best að skrifa þetta niður áður en það gleymist og halda svo áfram tiltekt í skápum. Er búin að komast að því að það getur verið árangursríkt og ekkert svo leiðinlegt að taka allt út úr skáp og sortera fyrir framan imbann. Búin að fylla tvo poka sem fara rakleiðis í bílskúrinn. En já, uppskrift.

Þistilhjörtu- sítrónu og möndlurisotto

• 1 Laukur
• 2 hvítlauksrif
• 3 dl arboriogrjón
• 8-10 dl grænmetissoð (2 teningar)
• 1 tsk þurrkuð salvía (má sleppa)
• Rifinn börkur af einni sítrónu
• 2 msk sítrónusafi
• 2 msk rjómaostur (má sleppa)
• 2 dl gróft rifinn paramesan
• 2-3 msk ólífuolía
• 1 msk smjör (má sleppa)
• Steinselja
• 1-2 dl möndluflögur
• Salt og pipar

Hitið olíu og smjör í potti/djúpri pönnu. Ég hitaði svo vatn í rafmagnskatlinum, helli svo í könnu plús 2 grænmetisteningar. Látið laukinn út á og um mínútu seinna hvítlaukinn. Hellið svo grjónum út í og hrærið í, þegar grjónin eru byrjuð að verða gegnsæ, þá hellið hluta af vökvanum yfir, eins og 2 dl. Hrærið reglulega í þegar grjónin hafa drukkið í sig vökvann, hellið þá 1 dl í einu eða svo. Passa að hræra í. Látið salvíuna út í, muna að mylja hana í lófanum til að "ýfa upp" bragðið. Mér datt í hug að hún væri gott mótvægi á móti þistilhjörtunum sem eru með svona söltu/súru bragði. Svo er auðvitað mjög gott að nota smá hvítvín ef maður á og þá best í byrjun, beint yfir grjónin.


Ég notaði svo um 3 dl af þistilhjörtum, ætli það sé ekki ca. lítil krukka eins og fást víða. Ég lét þau í sigti og skolaði mestu olíuna af með vatni. Þerraði það mesta af með eldhúsrúllupappír, skar svo niður í minni hluta. Ristið möndlurar, passið að þær brenni ekki, gerist svo snöggt. Svo 3 mínútum áður en tilbúið að bera fram, látið út í rjómaostinn, rífið sítrónu, sítrónusafa,smá salt og pipar, hrærið og að lokum þistilhjörtun. Ég lét smá á diska fyrir Sögu og Huga áður en sítrónusafi og þistilhjörtu fóru í. Stráið svo steinselju og möndlum yfir.